Diahuebs, 10 di october 2024, Departamento di Transporte Publico ta tuma e prome paso grandi den direccion di digitalisacion. Esaki ta e comienso pa modernisa e departamento y asina duna un servicio mas eficaz y eficiente.
E plataforma digital nobo di DTP lo permiti pa regularmente publica noticia y informacion importante, haciendo e servicio mas accesibel y transparente pa cada ciudadano y bishitante.
Departamento di Transporte Publico (DTP), previamente yama Dienst Openbare Personen Vervoer (D.O.P.V.), estableci na 1996, a bira DTP na aña 2012. DTP a tuma e rol como e entidad principal encarga cu preparacion, desaroyo, y evaluacion di leynan riba transporte publico. E departamento tin como meta pa asegura un sistema di transporte publico efectivo y funcional pa tur nan usuarionan.
Parti di DTP su tareanan principal ta inclui desaroya y ehecuta maneho di e Minister di Transporte, den e caso aki Sr. Ursell Arends. Alabes, DTP ta encarga pa mantene control pa cumpli cu e leynan, administra permisonan di transporte publico, y crea plan logistico pa maneho y desaroyo continuo di transporte publico.
E digitalisacion di DTP ta bai mas aya cu solamente un website. Segun Minister Arends, “Esaki ta un paso crucial pa modernisa e maneho di transporte publico na Aruba. E plataforma digital nobo lo permiti nos pa sirbi comunidad miho, cu servicio mas rapido y eficiente. Nos ta pone e fundeshi pa un sistema di transporte publico cu ta mas accesibel y transparente, y ta reforsa nos compromiso pa atende cu e necesidadnan di cada ciudadano y bishitante.”
Cu e cambio aki, DTP ta busca pa hisa e mobilidad na Aruba na un manera mas responsabel. E transformacion digital ta permiti un sistema cu ta mas alinea cu e modernisacion di Aruba, atendiendo cu e necesidadnan di comunidad na un manera mas efectivo y eficiente.
Minister Arends ta duna elogio na ful e team di DTP cu a bin ta traha incasablemente pa logra lansa DTP den su era digital. Cu esfuerso continuo DTP lo sigui transforma e organizacion pa yega na un sistema di transporte publico cu ta cuadra cu e era cu nos ta biba aden y tambe contribui positivamente den desaroyo di Aruba.
Pa mas informacion y ultimo noticia di DTP, por bishita e website na www.dtp.aw .