Segun riba rednan social E dama Vivian Johanna Duran di Avero Travel Agency ta e persona cu probablemente lo ta bezig ta estafando un cantidad di cliente di e agencia aki. E siman aki nos a wordo acerca pa varios persona cu a bira victima di estafa, esta cu nan a paga pa nan vacacion y a resulta cu e agencia aki despues di a ricibi varios sumanan grandi di nan clientenan, no a cumpli cu e clientenan y na momento cu nan tabata cla pa biaha a bin resulta cu nada no ta regla, mucho menos paga pa nan por subi avion.
Schotlandstraat, Eagle.
Nos a wordo acerca door di e clientenan di e agencia di viajes Avero Travel Agency. E cliente a contanos con nan a haya un sorpresa hopi amargo, na momento cu nan tabata para dilanti di e check in counter na airport, cla pa bay biaha y cu nan no por a subi avion pa motibo cu nan no tabata tin ni reserva y mucho menos nan ticketnan paga. Nan plannan pa pasa un vacacion na Colombia a para, cu tur cita di dokter haci, nan excursionnan paga, seguro di viaje paga y sin cu nan por bay vakantie.
Segun nos a compronde un famia so a perde mas di 5 mil florin, un otro persona a perde mas di 1700, florin, tambe riba red social nos por a lesa cu mas cliente a post con nan a bira victima di estafa di e agencia aki. Un a skirbi cu e la perde 900 florin y asina tabata tin varios persona na Aruba cu a bira victima di e agencia di viajes aki.
Un famia a conta, cu un of dos dia prome di bay biaha, nan a bay na e aerolinea, pa asina por a haya di adelanta nan asientonan asigna y nan tambe a haya un cara bou. Nada no tabata regla y mucho menos paga pa nan por a bay Colombia, dus niun momento e agencia aki a haci un reserva pa nan y mucho menos a paga entre otro e ticketnan y excursionnan, e famia lo a paga e agencia pa regla tur esakinan pa nan y e agencia no a cumpli cu nan.
E famia aki a bay na e agencia pero e dama a tene e porta na lock y no a habri porta pa nan, segun nos a compronde henter dia tabata yega clientenan cu a paga y no por a subi avion pa motibo cu e agencia no a cumpli di a paga e aerolinea e ticketnan, pero si a tuma e placa for di e clientenan.
Diaranson e agencia tabata tin su porta cera y a pone un papel na e porta bisando, “cu pa motibo di fallo tecnico den e sistema di aviacion nan no ta atende cliente, pero lo por yama na dos diferente number di celular.” E clientenan cu a wordo perhudica a trata na yama e numbernan di celular, pero lamentabelmente niun hende tabata contesta esakinan. Nos tambe a yama pa puntra mas informacion di kiko ta pasando, pero niun hende no a contesta nos yamada.
E caso aki ta den pleno desaroyo y tin varios cliente cu a bay of lo bay polis pa e agencia aki y especialmente pa e dama Vivian Johanna Durano, cu a dal varios cliente abou. Algun cliente ya caba lo a busca un abogado pa cuminsa un caso contra e agencia, tambe varios otro a bay polis pa denuncia e dama aki. Avero Travel Agency, ta un agencia cu ta registra na Camara di Comercio di Aruba. E cliente ta bay na un agencia asina paso e ta confia cu ta trata di un agencia di viajes serio y cu no lo perhudicanan.
Esaki ta dos di e victimanan di Avero Travel Agency nan a publica lo siguiente riba medionan social
