Dobel celebracion pe tremendo teamplayer di wondpoli
E dia cu ela haci aña y tabatin liber a pidi’e pasa Hospital pa un reunion importante. Cindy Martinus no a duda y a schedule tempo pa toch e pasa. E no a sospecha nada ora ela drenta pues un momento inolvidabel cu net riba su cumpleaños e ta topa cu su famia y amiganan na su departamento hunto cu miembronan di Hunta di Directiva y coleganan. Ela keda masha sorprendi y hopi contento di tende cu ela wordo nomina pa ta e empleado di luna di september 2024. Un gran sorpresa di tende for di presidente di Hunta di Directiva Jacco Vroegop mes, cu nan ta masha agradecido y contento cu tur e trabou cu e ta eherce.
Na februari aña pasa Cindy a cuminsa traha na wondpoli y di biaha a ripara cu e ta tremendo den ehecuta su trabou y cu ela adapta di biaha na su team manera ta parce cu e tin hopi aña caba trahando cu nan. E ta semper cla y dispuesto pa yuda cualkier caminda y no ta importa si ta colega, pashent of bishitante. E ta siña lihe y ta gusta educa su mes pa optimalisa cualkier di su tareanan diario.
E tin hopi comprension pe pashentnan y ta organisa y regla nan asuntonan di biaha. E tin bon comunicacion cu e companianan di transporte pe pashent. Pero tambe e ta comunica tremendo cu dokter, colega y e pashent mes unda cu su follow-up semper t’ey. Su cariño y stem suave nunca falta y sigur e sonrisa ta alegra e dia di un y tur cu t’ey. E ta un persona positivo cu tur hende por yega facil na dje y cu tin un actitud enfoca riba resolve problema.
Cindy ta un colega profesional, tin un bon humor y ta amabel cu tur hende. Cindy a demostra di ta un super trahado for di comienso y cu su coleganan ta spera e keda cu nan pa hopi tempo. Team completo di HOH ta contento cu Cindy t’ey den e team. Masha pabien Cindy!