Oranjestad – Kiwanis Club of Palm Beach ta mira bek ariba un aña exitoso. Durante 2023-2024 a organisa eventonan pa recauda fondo, a haci donacionnan y a traha hunto cu otro clubnan, cu e mision pa sigui sirbi muchanan y famianan di Aruba. Pa e aña cu ta cuminsa 1 di october 2024, e club ta hopi emociona pa anuncia nan plannan pa sigui traha y yuda e comunidad.
Logronan den 2023-2024
Kiwanis Club of Palm Beach a logra hopi bon resultado durante e aña 2023-2024, impactando positivamente bida di hopi mucha y famia riba nos isla:
Fondonan recauda: E club a organisa cuater (4) evento grandi: “Over the Moon” Night Golf Tournament, Masquerade Party, F&B tent riba ruta di Carnaval y Ride4Kids. E esfuersonan aki a logra un total di Afl 200,000 netto (te cu August 2024).
Donacion generoso: Despues di temporada di Carnaval, e club a haci donacion inmediatamente di Afl 100,000 na 14 instancia, apoyando diferente causanan riba e isla. Cu e fondonan recauda for di Ride4Kids a yuda 225 mucha cu nan school geld.
Proyecto “Back to School”: Den colaboracion cu otro tres (3) club di Kiwanis na Aruba, e proyecto “Back to School” a distribui 150 tasnan di scol cu un balor di
Afl 30,000 na muchanan di famia di menos recurso.
Proyectonan hands-on: E club a participa na dos (2) proyecto, K1-Day hunto cu otro clubnan di Kiwanis na Colegio Arubano y conhuntamente cu otro clubnan local a duna Ambiente Feliz un face-lift, y di e forma aki duna directo na e comunidad.
Distribucion di Child Car Seat: Hunto cu Wit Gele Kruis a haci donacion di 17 Child Car Seat na famianan di menos recurso, pa seguridad di nos muchanan.
Aprobacion di YCPO: E club a aproba mas cu Afl 27,000 na donacion pa sostene mas cu 16 proyecto cu e iniciativa di Young Children Priority One (YCPO), cu ta duna sosten na programanan enfoca na bienestar di nos muchanan.
Plannan pa e aña 2024-25
Kiwanis Club of Palm Beach ta cla pa sigui construi riba su exitonan cu programanan nobo pa sigui yuda nos muchanan y comunidad di Aruba:
Expansion di eventonan pa recauda fondo: Tin plania cinco (5) evento pa recauda fondo, cu ta inclui e Masquerade Party (21 di feb. 2025; benta di ticket ta cuminsa dia 11 di november 2024), F&B tent di Carnaval durante temporada di Carnaval 2025, KCPB Charity Regatta (juni 2025), Ride4Kids na augustus 2025 y torneo di golf “Over the Moon” (september 2025).
Lansamento di e programa “Invest in Me”: Dia 5 di october 2024, e club lo lansa su programa “Invest in Me” pa educacion financiero pa muchanan. E programa ta enfoca pa siña muchanan tocante maneho di placa personal. A registra 20 di e 37 scol primario pa e prome aña y sesionnan lo cuminsa na december 2024 y sigui te na april 2025. Ta motiva boluntarionan y sponsornan pa duna sosten na esaki.
Eventonan di Limpiesa di Barionan “Aruba Limpi”: Den colaboracion cu otro clubnan di Kiwanis y organisacionnan local, lo tuma luga un dia pa limpiesa den comunidad. Esaki ta programa ariba diasabra 9 di November 2025. E evento ta enfoca pa trece miembronan, famianan, y e comunidad hunto pa tene nos medioambiente limpi.
Continuacion di distribucion di Child Car Seat: E club lo sigui cu su programa di distribui Child Car Seat pa seguridad di nos muchanan. Fecha y cantidad ta wordo comunica despues.
Introduccion di “Weekend Warriors”: Lo inicia un programa nobo bou di e nomber di “Weekend Warriors”. Lo duna comunidad e oportunidad pa manda peticion pa proyectonan chikito cu ta beneficia muchanan y e comunidad. Tur peticion lo wordo atendi pa un comision. E programa aki ta un forma pa yuda e comunidad directamente.
Peticion pa donacion ta habri pa comunidad: Ta invita e comunidad pa bishita e website http://www.kiwanispalmbeach.com, pa asina manda peticion pa donacion relaciona cu muchanan. Tur peticion lo wordo atendi pa un comision.
“Nos ta sumamente orguyoso di tur e trabou cu nos miembronan y boluntarionan a pone durante e aña cu a caba di pasa,” palabranan di Ross Brezovar, President di Kiwanis Club of Palm Beach. “Mientras cu nos ta para cla pa e aña Kiwanístico 2024-2025, nos ta sigui na sirbi nos comunidad y inverti den e proximo generacion. Nos ta invita tur hende pa tuma parti den nos mision—sea como boluntario, sponsor, of sostenedor—pa logra un impacto duradero den bida di muchanan y famianan na Aruba.”
Kiwanis Internacional ta un organisacion caritativo mundial, dedica na haci nos mundo mihor door di cambia un comunidad of un mucha cada bes. Mas informacion por haya riba: www.facebook.com/kiwanispalm beacharuba
