Oranjestad – 30 di september, 2024 – Durante e siman di 23 di septemper pa 27 di september, Aruba Bank a dedica un siman completo na bienestar di su empleadonan cu e objetivo pa promove un estilo di bida saludabel y apoya nan bienestar fisico y mental. Tur empleado di Aruba Bank y den tur sucursalnan por a participa na varios actividad cu a tuma luga durante e siman.
E programa di Aruba Bank “Health Week” a cuminsa cu un “Health Check Day”, caminda empleadonan a haña oportunidad pa evalua nan salud fisico, midi nan presion, sucu y presion di wowo. Esaki ta un parti esencial pa motiva tur empleadonan pa tuma paso pa un bida mas saludabel.
Durante e siman, a tuma lugar lecturanan riba salud mental, caminda e experto Diana Salcedo a presenta varios tema tocante bienestar mental y e importancia di e balansa entre stress di trabou cu bienestar personal. E lecturanan a duna empleadonan tips y conseho valioso.
Un di e momentonan favorito di e siman tabata “Healthy Snack Day” riba diahuebs y diabierna caminda empleadonan a haña un treat nutricional y delicioso.
Aruba Bank ta compromete na e bienestar di su empleadonan, y por medio di eventonan manera Aruba Bank “Health Week”, nan ta sigui inverti den un ambiente di trabou cu ta promove un bida sano, tanto fisico como mental. E banco ta sumamente orguyoso di su empleadonan cu a participa cu entusiasmo.
