“E proyecto ta representa hende muhenan fuerte, resiliente y cu a marca historia na Aruba”
ORANJESTAD – Diahuebs 26 di september, Prome Minister Evelyn Wever-Croes hunto cu Minister Rocco Tjon a ricibi bishita di Miss Universe Aruba 2024, señorita Anouk Eman.
Anouk ta preparando pa e certamen final di Miss Universe 2024, dia 16 di november na Mexico City unda e lo representa Aruba dignamente. Prome Minister durante e atardi aki a presenta Anouk e pin di e bandera di Aruba y a entreg’e un sjaal representando e mata di Kibrahacha cu ta un insigna di fortalesa di e hende muhe.
Durante e encuentro Anouk a tuma e oportunidad pa acerca Prome Minister pa e mandatario forma parti di su proyecto “Iron Woman”. Esaki ta un proyecto cerca di su curason, unda e ta acerca 9 hende muhe fuerte den comunidad cu ta un ehempel y inspiracion pa otro hende muhe y mucha muhe.
Anouk a menciona cu e nomber di e proyecto ta pa motibo cu desde cu el a haci un operacion di lomba, el a haya e nickname “Iron Woman”, y e 9 participantenan na e proyecto ta representa e 9 letternan di su nickname. Y pa e motibo di loke e proyecto ta representa, Anouk a invita Prome Minister di Aruba pa ta parti di e proyecto “Iron Woman”, ya cu e mandatario ta un digno ehempel di un hende muhe fuerte, resiliente y a marca historia na Aruba.
Prome Minister a keda sumamente contento cu e invitacion y a felicita Anouk pa su iniciativa cu e proyecto aki y a menciona di ta honra di forma parti di e grupo “Iron Woman”. Tambe e mandatario a tuma e oportunidad pa desea Anouk hopi exito na e certamen di Miss Universe 2024 na Mexico City dia 16 di november.