ORANJESTAD – Riba dia Mundial di Turismo, Prome Minister Evelyn Wever-Croes a asisiti un conferencia organisa pa Aruba Tourism Authority, na unda e tema central di e conferencia ta “overtourism”, cu ta un reto grandi na e momentonan aki pa Aruba, ya cu esaki ta causando descontento den nos fiel bishitantenan y comunidad en general.
Aruba a kibra tur record
Riba e dia importante aki, Prome Minister a enfatisa riba e importancia cu e sector aki tin pa pais Aruba. Turismo ta e pilar mas grandi di nos economia, mirando cu e ta crea finansas publico y espacio financiero pa inversion. Tambe turismo ta crea empleo pa comunidad, treciendo bienestar y progreso. Den e ultimo aña a keda comproba cu Aruba ta un destinacion hopi gusta pa e turistannan, mirando cu apesar di e situacion mundial, e sector aki a crece, kibrando record di añanan anterior.
“Overtourism”
Apesar di tur e beneficionan, turismo tambe ta bin cu su retonan, y aki ta referi na loke ta “overtourism”. E mandatario a expresa cu ta di suma importancia pa para keto y wak ki efecto “overtourism” tin riba termino largo, ya cu e tema aki ta creando descontento no solamente entre nos mesun hendenan, sino tambe entre nos fiel bishitantennan.
P’esey ta importante pa Gobierno sinta hunto cu e instancianan concerni pa alinea y bin cu un strategia, den cual ta determina ki direccion Aruba lo kier sigui bay cu turismo. Pa Gobierno ta importante pa laga atras un pais stabil, na unda futuro generacionnan tin mas oportunidad pa por logra nan metanan.
E compromiso di Gobierno
“Mi kier a enfatisa cu e Gobierno di Gabinete Wever-Croes no ta esun cu a duna permiso pa e hotelnan cu tin bou construccion actualmente, cu excepcion di Secret Hotel na San Nicolas. Tur e construccionnan cu tin adando cu e hotelnan nobo den e area hotelero, ta compromisonan cu tin haci di hopi aña pasa pa e Gobierno anterior. Tambe mi kier sigura comunidad completo, cu e Gobierno aki lo sigui traha na bienestar di pueblo y no lo duna permiso, ni tereno mas pa niun hotel nobo.
Varios ley den preparacion
Actualmente, tin varios ley andando pa regula y frena e desaroyo, sigurando cu turismo ta sigui ta sostenibel, duradero y den bienestar di tur ciudadano di pais Aruba. Tambe tin un ley den preparacion pa regula loke ta Airbnb. Esaki ta importante pa por sigura cu Aruba ta keda un producto di calidad, y cu lo keda casnan disponibel pa nos mesun hendenan biba aden.
Mi kier a felicita Aruba completo, y gradici tur esnan cu ta labora den e sector turistico pa nan trabou incansabel den yuda desaroya e pilar importante aki. Ban sigui aprecia y conserva e bunitesa di nos pais, y e amabilidad y cordialidad di nos hendenan, pa asina nos por sigui promove e baranca aki, como e isla mas gusta den Caribe”, Prome Minister a expresa.