ORANJESTAD — Manera ta conoci Ley di Plan di Mayor: (LV Voortgezet Ouderschap en Zorgvuldige Scheidingen) a bay na vigor dia 1 di maart 2024. E Ley aki ta basa riba e derecho cu un mucha tin pa wordo cria door di ambos di su mayornan apesar di un separacion. Mayornan cu divorcia/separa tin e obligacion di traha un Plan di Mayor caminda nan mester stipula con nan ta bay comparti e responsabilidadnan pa cu nan yiunan. Tambe e ley ta pone enfasis riba articulo 12 di tratado internacional di derechonan di mucha, cual ta cu e mucha mester tin un bos den asuntonan cu ta regard’e.
Den cuadro di preparacionnan pa cu introduccion di e ley aki. Plan di Mayor a haña fondonan for di Ministerio di Husticia di Hulanda Jeugd Criminaliteit Preventie Fonds pa asina por cubri entre otro estudionan extenso pa midi e necesidad di e ley y su intervencionnan, y tambe pa midi e efectividad di e intervencionnan.
Michella Steenvoorde – Laclé kende ta e palanca tras di Plan di Mayor, a coördina un onderzoekovereenkomst entre Universidad di Aruba y Universidad di Utrecht pa asina haci estudionan rond di e tema.
E overkoeplende vraag ta: Con nos hobennan y nan mayornan ta funciona despues di un separacion, y con leu nos por wak cambionan entre e situacion prome cu e ley y despues cu e ley pa bin cu Plan di Mayor obligatorio, y con efectivo un trayecto di mediacion ta den mitiga e problemanan rond di e separacion?
Pa por contesta e pregunta aki, nos a parti’e den 4 categoria di deelvragen:
- Con un hoben ta funciona despues di un separacion den termino manera e.o. salud mental, funcionamento na scol, comportacion delicuente, contacto hoben y mayor, criansa di e mayornan y e relacion entre e hoben y e mayor?
- Tin un diferencia entre e funcionalidad di hobennan despues di un separacion, prome y despues di introduccion di Ley Plan di Mayor?
- Nos por guia e hoben y nan mayornan pa mitiga efectonan negativo di un separacion door di ofrece nan un trayecto di intervencion defini?
- E parti administrativo: cuanto caso ta wordo lanta na corte pa divorcio, custodia comparti, alimentacion, luga di biba, areglo di bishita, cuanto covenant/plan di mayor a wordo entrega, cuanto mucha a haña audiencia cerca e huez?
Pa contesta deelvraag a: Plan di Mayor a haci encuesta “Nos Hoben y Su Bida Familiar na 13 scol secundario na Aruba. Y lo ripiti e encuesta aki den 2 aña.
Pa contesta deelvraag d: Plan di Mayor a haña permiso for di Corte di Prome Instancia pa analisa e casonan di e añanan 2020/2021/2022/2023 y 2024 te cu februari prome cu introduccion di Ley Plan di Mayor.
Michella ta splica cu Plan di Mayor Aruba ta hopi satisfecho cu nos a colecta e data, y awor e data lo wordo analisa door di e team di dr. Luc Alofs di Universidad di Aruba y dr. Inge van der Valk di Universidad di Utrecht.
Mayornan cu ta atravesando un divorcio of separacion por acudi na Loket Plan di Mayor pa un intervencion gratis. E prome stap ta pa yena un formulario di inscripcion riba nos webside cu ta www.plandimayor.org, una vez cu ambos mayor yena esaki. Plan di Mayor ta invita nan pa un intake y lo recomenda cual intervencion ta pas pa nan situacion.
Plan di Mayor ta situa na MfA St Cruz y tin un WhatsappLine 5696871
Plan di Mayor mobile phones: 5941545/5941533