Aruba Basketball Bond su seleccion U15 ta den ful preparacion pa participa na e Paradise Showdown Tournament cu lo tuma luga na St Maarten. E wega di fogeo a tuma luga na Aruba Juniors cual porcierto tabata basta yen cu famia, amigo y fanaticonan di basketball. E torneo ta organisa pa Performance Sports Academy Athletic Association. E meta principal di e torneo ta pa cada hungado demostra su habilidad y crea exposicion pa e hoben atleta hungando contra e miho hungadonan di cada pais cu ta participa na e torneo. E torneo lo tuma luga di 5 pa 10 di October 2024. Aruba ta den Pool A hunto cu St Maarten, St Kitts y Saba. Aruba lo tin e honor di hunga e wega di apertura contra St Maarten. Earl Clemencia ta e Head Coach y ta wordo asisti pa Starlin Arismendy.
Diadomingo cu a pasa nos seleccion a hunga un wega di fogeo contra e team di cadet di Aruba Juniors. E wega a cuminsa cu Seleccion hungando un wega lihe cu a causa algun perdida di bala. Aruba Juniors ta probecha di e erornan y ta saca un ventaha di 12-8 den e prome kwart di wega. Den e di dos kwart coach Earl a haci algun cambio y a duna instruccion na e hungadonan. Seleccion tabatin menos perdida di bala y a forma atakenan organisa pa Denzell Dirksz y Dempsley Brice pa yega y score na e basket defendi pa Aruba Juniors. Halftime ta bay aden 48-35 pa Seleccion U15. Den e di dos tempo Seleccion a sali motiva pa “seal” e wega hungando presion riba ful e cancha. Aruba Juniors tabatin problema pa defende e presion y tabata comete perdida di bala. Seleccion a probecha di esaki y tabata haya tironan facil un tras di otro pa asina gana e kwart 21-13. E ultimo kwart seleccion a sigui presiona y ta score 23 punto pa gana e wega cu score di 71-49. Dempsley Brice, Denzell Dirksz y Jaydrick Maduro tabata e topscorernan cu 19, 17 y 12 punto respectivamente. Dempsley Brice y Cesar Arismendy tabata e miho reboteronan cu 10 y 9 cada un. Briant Jansen, Jayderick Maduro y Jonathan Yepes tabatin 8, 6 y 4 steal respectivamente. Coachnan Clemencia y Arismendy por mira atras riba un wega satisfactorio di nan seleccion y nan tin confiansa cu nan lo haci un bon papel na St Maarten.
E wega di fogeo a tuma luga na Aruba Juniors cual porcierto tabata basta yen cu famia, amigo y fanaticonan di basketball
Diadomingo awo 29 di September 2024 lo tin e ultimo wega di fogeo. Esaki lo ta contra un seleccion forma pa hungadonan di Cadet di Stealers y Aruba Juniors. E wega ta cuminsa 6or atardi. Carchi ta obtenibel cerca e hungadonan di seleccion of na porta.