Na Nacionnan Uni,
“Hunto nos lo traha pa un mundo mas sostenibel, husto y resiliente enfoca riba e futuro generacion”
ORANJESTAD – Na Nacionnan Uni, durante e Summit of the Future, Prome Minister Evelyn Wever-Croes representando Aruba y Reino Hulandes, hunto cu Minister President di Jamaica,
Andrew Holness a organisa un conferencia (side-event) tocante e importancia di e rol di hobennan den futuro. E conferencia tawata basa riba “Declaration on Future Generations”, cu ta un declaracion cu ta explora solucionnan pa salvaguardia e necesidadnan di futuro generacionnan riba temanan di demografia, clima y desaroyo.
Prome Minister durante su discurso a indica cu tin pais cu ainda ta recuperando di e crisis di e pandemia y otronan ta bibando momentonan di conflicto y guera. Ultimo añanan mundo a bira mas peligroso y impredecibel. Pero tambe cada crisis por ta un oportunidad pa bin cu cambionan, y e Declaration on Future Generations y Summit of the Future por haci esaki. Awor ta e momento cu e comunidad global por dicidi di tuma accionnan diferente.
Tambe Prome Minister a menciona cu e declaracion no solamente ta enfatisa e manera cu tur e retonan cu paisnan ta enfrenta ta interconecta, manera cambio climatico y e desigualdad creciente den e sociedad, pero tambe pa cambia e ‘status quo’, y asina mustra solidaridad cu cada generacion, y pa tuma responsabilidad pa e bienestar di esnan cu ta bin despues di nos.
Pa paisnan chikito, manera e islanan Aruba, Corsow y Sint Maarten, e declaracion aki ta sumamente importante. Cambio climatico por afecta e tres islanan chikito considerablemente. Un horcan fuerte por afecta un famia pa generacionnan, pero Prome Minister a menciona di ta keda optimista pasobra ora Declaration on Future Generations bay den accion, esaki lo conduci na miho coordinacion y resultadonan real.
Prome Minister:
“Mayan e Declaration on Future Generations lo wordo anexa na e Pact for the Future y e Global Digital Compact. Durante e side event nos lo wak mas di cerca con pa converti e declaracion den accionnan practico y cua pasonan pa tuma prome. Gobiernonan tin e responsabilidad primario pa salvaguardia e necesidadnan y interesnan di e futuro generacion, y e enfoke di e conferencia ta riba e pasonan concreto y accionnan cu paisnan miembro mester tuma pa cu e implementacion completo di e declaracion.
Nos ta pidi gobiernonan, sociedad civil y otro stakeholders pa traha hunto y converti compromisonan den resultadonan real. Hunto nos lo traha pa un mundo mas sostenibel, husto y resiliente enfocando riba e futuro generacion”.