Danki pa e dedicacion, amor y profesionalismo pa educa nos muchanan.
ORANJESTAD: Diahuebs ultimo, Minister Endy Croes a bishita scol basico Maria Goretti College pa e celebracion di Juffrouw Shamila Briezen, kende a cumpli 30 aña den enseñansa di Aruba. E mainta a inicia cu Santo Sacrificio di Misa, unda cu pastor a duna bendicion y despues a sigui cu e celebracion na scol acompaña di pa henter e team di Maria Goretti College. E alumnonan di cada klas a prepara un video sorpresa pa felicita Juffrouw Shamila. Shamila tabata alumno di Maria Goretti College, despues a continua cu su estudio na Colegio Arubano y IPA. Juffrouw Shamila a inicia su carera como maestra na Maria Goretti College, unda el a traha den klas uno (1), despues den klas tres (3), klas cuater (4), a fungi diesun (11) aña como “leesbegeleider” y e aña escolar aki e ta maestra di klas tres (3). Sra. Briezen tin un pasion y entusiasmo enorme pa duna les na e alumnonan. E ta un maestra hopi responsabel, dedica na su trabou y hopi aprecia pa su coleganan. E ta un maestra cu ta motiva pa engrandece su conocemento y comparti esaki cu su coleganan. Juffrouw Shamila ta gusta lesa, canta y haci “arts and crafts”. Den nomber di Gabinete Wever – Croes II, Minister Endy Croes a haci entrega di e Reconocemento di Excelencia na Juffrouw Briezen pa su dedicacion y profesionalismo durante 30 aña den ensañansa di Aruba. Juffrouw Briezen a expresa cu e ta hopi contento di ricibi e reconocemento di parti di gobierno. Por ultimo, e mandatario di Enseñansa ta gradici cabesante Juffrouw Mirla y e team di Maria Goretti pa e invitacion y caluroso recepcion. “Di curason hopi pabien y danki pa tur loke bo ta significa pa enseñansa di Aruba”, Minister Endy Croes a finalisa.