ORANJESTAD – Awe mainta e homber D.F. (36) di Hulanda y biba na Rotterdam, a presenta den Corte pa scucha su sentencia. Luna pasa tratamento di e caso a tuma lugar, caminda Fiscal a exigi 9 aña di prison pa D.F., kende e ta haya ta culpabel di intento di mata.
ARUBA NATIVE por a compronde cu Hues a confirma e exigencia di Fiscal. E homber D.F. a rabia ora el a scucha su sentencia.
Dia 30 Augustus 2024 durante tratamento di e caso, Fiscal a bisa Hues cu ta un hecho cu tabatin un tiramento na Molen riba 21 Januari 2024. E pregunta ta, kende a tira. Por a mira riba video di seguridad tur loke a sosode riba e parkinglot dilanti di Molen. Polis ta conclui cu ta D.F. a tira riba e auto, ora e tabata para tras di un auto preto. E hombernan V.E. y M.E. a sufri rasca di tiro. Fiscal ta haya legalmente proba cu ta D.F. a tira, aunke cu D.F. ta desmenti esey. Fiscal a bisa cu por a mira riba video cu un tal S. a saca algo for di su zij y pasa D.F. esaki. Despues e tiramento a sosode. Fiscal ta haya cu e tiramento ta un intento di mata riba V.E. y M.E. E ta haya D.F. culpable di posecion di arma di candela y a causa destruccion riba e auto cu el a tira. Fiscal a bisa cu tabatin autonan para riba parkinglot y tabatin mas hende ta cana rond. El a bisa cu D.F. tabatin suerte cu nada mas serio a sosode.
Pa cu e castigo, Fiscal a bisa cu e ta tene cuenta cu D.F. a pone bida di hendenan den peliger. A sacudi comunidad y ta crea sentido di insegurida. Fiscal a exigi 9 aña di prison.
SENTENCIA
Awe mainta Hues a bisa cu e ta haya legalmente proba cu D.F. a tira riba 21 Januari 2024 riba un auto banda di e parkinglot di Molen. Esaki Hues ta considera un intento di mata mas biaha haci. Tambe Hues ta haya D.F. culpabel di posecion di arma di candela y destruccion. Pa cu e castigo, Hues a bisa cu e ta tene cuenta cu a tira riba un parkinglot di Molen den direccion di un auto. Dos persona a resulta herida. Un na bariga y otro na nek. Hues ta haya cu D.F. a crea un situacion peligroso pa otronan. Hues a confirma e exigencia di Fiscal y a condena D.F. na 9 aña di prison.
Por a mira cu D.F. no a keda nada contento cu e sentencia y tabata manera zundra. Su abogado a bay papia cun’e y despues miembronan di CEA a hib’e. Tempo lo mustra si e ta bay apela e sentencia of no.