Riba un fecha manera awe pero 65 aña pasa a nace na Jamaica un baby mucha muhe y su mayornan a yam’e Ericia Claire Daley. Despues di su infancia henter famia a bay biba na Inglatera. Aya el a pasa su añanan como teenager y a studia e idioma Ingles. Segun aña pasa el a bay Hulanda pa biba y eynan el a enamora y forma su famia. E famia Daley-Romney a haya 2 yiu muhe. Cu e muchanan ainda chikito famia Daley-Romney a biaha pa Aruba unda nan a establece nan mes. Na Aruba juf. Claire Romney, manera tur hende conoc’e, a traha na Colegio Arubano, despues Colegio San Nicolas y ultimo na Colegio Nigel Matthew.
Awe. 16 di september, nos ta para un rato keto na e trayectoria di juf. Claire Romney como docente, mentor, conrector, counselor y e rol di mama di hopi studiante. Juf. Romney sigur ta un persona hopi keri na scol tanto pa e alumnonan, pa su coleganan y demas personal. Alabes, juf. Romney ta un persona hopi critico, aunke semper constructivo pa e bon di e alumnonan y pa e bon di e scol. Juf. Romney ta tambe un persona cu bon bista riba expresion corporal. E ta mira of sinti cu algo no ta bon cu un alumno of colega. E mes ta acerca e persona y ta tuma su tempo pa atende cu e persona, pa papia di loke ta pasando y con pa yuda otro.
Awo cu juf. Romney ta bay disfruta di su pensioen bon mereci, nos sa cu e no ta bay completamente. E lo keda activo como docente di Ingles na Colegio Nigel Matthew pa algun klas.
Den nomber di tur alumno di Colegio Nigel Matthew y tur nos personal, nos kier bisa juf. Romney DANKI pa tur e añanan di servicio, pa e pasenshi, pa e momentonan di alegria y tristesa cu nos a pasa hunto y tambe pa e biahanan cu juf. Romney a coregi nos y mustra nos otro posibilidadnan pa alcansa nos metanan. Danki di curason.