Gino Juliana ta un adicto ambulante cu ta keda na un cas na Shiribana y semper sa para na Wendy’s Tanki Leendert cu Subway Paradera. E ta un adicto cu tin su cosnan di “malamuchanan” pero ta keto y cu bon manera, e ta para saluda tur hende cu pasa su dilanti.
Shiribana: Dialuna den careda di 5’or di atardi, por a mira e adicto ambulante Gino Juliana(58) cu un rolater ta lucha lastra y poco poco despues di basta rato a bay sinta na su lugar di custumber cu ta dilanti Subway Paradera. Gino tabata mustra hopi malo, nos di Arubanative a nota esaki y mesora a bay puntre kiko pas’e, vooral nos tabata tin basta siman sin mira Gino.
E la conta nos cu e la haya un accidente, auto lo a dal e, pero e no por ni corda si tabata anochi, den dia y ni na unda e auto a dal’e. Segun nos a compronde di un persona hopi yega na Gino, cu ta mas cu un luna pasa, na momento cu e tabata coriendo su bais, un auto a dal’e y e chauffeur lo a duna Gino 300 florin pa no yama polis, segun un persona na e sitio a bisanos cu tabata un homber chines pero cua nos no sa. Gino ni 24 ora despues di e accidente a haya un stroke y a keda mitar curpa lam. E la wordo hiba hospital, a keda mas cu un luna interna y despues a wordo manda cas, aparentemente e lo ta riba un lista di espera pa haya un lugar na cas di hende grandi.
Awe despues cu nos a mir’e, nos mester a bati alarma, su pianan tabata hopi hincha, cu no tabata tin caminda mas pa e expande, su man tambe tabata hincha y Gino tin un breuk hopi grandi, cu sigur ta hopi peligroso pa su salud. E hinchazon nan aki sigur ta señalnan cu algo den su curpa no ta funcionando manera mester ta. Nos a dicidi di bay live y a cuminsa pidi ayudo pa Gino.
Despues di un rato Gino Frans di Stichting Eliezer na Paradera, a presenta pa mira e situacion y con e lo por yuda Gino Juliana, pero mirando su situacion delicado di salud, e no por a transporte y a bisa cu Gino mester atencion medico urgentemente y pa yama un ambulance. Despues cu Gino haya tratamento medico, e lo por tuma Gino cerca dje.
Nos a yama ambulance y a splicanan e situacion di Gino, nan a compronde y a bisanos cu nan ta hopi druk, pero cu nan sigur lo bin busca Gino. Enberdad un rato despues nan a yamanos y a bisanos cu tin un ambulance na caminda, na yegada e paramediconnan, a mira e seriedad di e situacion di Gino, mesora a pone riba brancart y a transporte pa hospital.
Nos ta awo pendiente si hospital ta bay trat’e of ta djis dune remedi y mande back riba caya cu su rolater,cu ta su unico medio di transport’e paso Gino ta mitar curpa lam y sigur no por core su bais mas.
Nos kier a bisa un danki na Gino Frans, 911 alarm Centraal y especialmente personal di ambulance cu a actua hopi lihe.
