E barku di marina Hulandes Zr.Ms. Holland, nabegando aktualmente pa Wardakosta di Karibe Hulandes, a interseptá un transporte di droga serka di e islanan ABC dia 12 di sèptèmber. Un total di 1.363 kilo di kontrabanda a keda interseptá.
E asina yama go-fast a ser deskubrí pa Wardakosta. Mesora e FRISC di e barku di stashon Zr.Ms. Holland a ser dirigi pa e go-fast pa interseptá esaki. E tripulashon di e FRISC a pone e go-fast stòp, despues di indiká ku señalnan di atvertensia, tironan di atvertensia i despues ku tironan dirig riba e motornan pa por stòp e go-fast. E akshon ku e FRISC a ser realisá pa un tim kombiná di e tripulashon di e barku, e Eskuadron Marino di Flota i agentenan di Wardakosta. Despues ku a deskubrí e go- fast, e sinku sospechosonan di e go-fast a tira e bultonan di droga den laman. Tur e paketenan a ser saka for di laman dor di e tim di Zr.Ms. Holland i e sinku sospechosonan a ser detení. E sospechosonan i e kontrabanda a keda entregá despues dor di e barku di stashon na Wardakosta di Karibe. Na total a konfiská 1.231 kilo di kokaina i 132 kilo di mariwana, Wardakosta a entregá tur e sinko sospechosonan, di kual kuater di nashonalidat venesolano i un colombiano i e droga na Kuerpo Polisial di Karibe Hulandes na Boneiru kaminda e droga a ser destruí.
E barku di stashon Zr.Ms. Holland ta aktivo den e region di Karibe komo barku patruyero ta traha huntu ku e Wardakosta Merikano i Wardakosta di Karibe Hulandes den operashonnan kontra droga. Esaki ta e di dos kaso grandi den un siman pa Zr.Ms. Holland.
