Willemstad – Corsou ta sigui e recomendacion di Colegio di supervision financiero Corsou y Sint Maarten (Cft) y ta reserva recursonan adicional den e proyecto presupuestario pa 2025 pa compensa e explotacion deficitario di Curaçao Medical Center (CMC). Cft tin basta tempo ta urgi e pais pa incorpora e riesgonan financiero di e situacion financiero delicado di e hospital den e presupuesto di pais di un manera corecto, y ta considera e paso cu Gobierno di Corsou ta duna actualmente ta algo positivo.
Den e proyecto presupuestario, Corsou ta elabora cu mas detaye e direccion di solucion pa e problematica financiero di CMC cu a presenta anteriormente. A pesar cu no a duna splicacion ainda pa tur e compenentenan di e solucion, esaki ta un paso importante den direccion di un explotacion duradero di e hospital.
Na mes momento, ainda e necesidad pa reforma e paisahe di cuido ta grandi. Corsou ta gasta mas cu 13 porciento di e producto nacional bruto na cuido, dos biaha mas cu e promedio den Caribe. E gastonan alto di cuido ta contribui na e presion alto di impuestonan y primanan cu tin na Corsou.
Maneho financiero
Riba 10 y 11 di september 2024, Cft a bishita Corsou. E tema di e bishita aki tawata maneho financiero. Den combersacion cu e Conseho di Minister di Corsou, Cft a expresa su preocupacionnan tocante di e hecho cu e mehoracion di e maneho financiero di e pais no ta yega na e nivel anticipa. A pesar cu Corsou ta dunando pasonan apropia, e meta di haya un declaracion di control aprobatorio tocante di e cuenta anual 2026 ta core peliger. Cft a urgi Gobierno di Corsou pa haci tur loke ta posibel pa permanentemente mehora maneho financiero.
Bon maneho financiero ta importante pa percura cu ta emplea e recursonan publico di un manera eficaz y corecto, sin malgasta ni abusa nan. Ademas, transparencia y hustificacion anual tocante di e maneho (financiero) cu a aplica, ta esencial pa un gobierno confiabel.
For di 2019, cu guia di e Roadmap pa un declaracion di control aprobatorio tocante di e cuenta anual 2026, Corsou ta traha riba e mehoracion di maneho financiero. Cft ta mira progreso, pero tin peliger di retraso. Cu un priorisacion adecua di medidanan, un empleo eficaz di hende y recursonan, y un compromiso publico duradero di e Conseho di Minister, Corsou ta capaz pa logra resultadonan.
Inversionnan
For di 2025, Corsou ta presupuesta un subida considerabel di inversionnan nobo, parcialmente financia mediante prestamonan contrata cerca Hulanda. Cft tin basta tempo ta pidi atencion pa e nivel di inversion relativamente abao, y ta considera cu esaki ta un desaroyo bon bini. Den e marco aki, Cft ta mustra riba e importancia di inversionnan cu ta economicamente rendabel y cu ta fortalece e economia di e pais. Cft ainda mester evalua e intencion pa contrata prestamonan nobo. P’esey ta importante pa Corsou entrega mas pronto posibel e datonan tocante di e sector colectivo di e pais.