ORANJESTAD – Durante tratamento di e caso di asesinato cruel di e miembro di CEA, Sergio Maduro, Hues a mustra cu Recherche a graba combersacion di Bryan Jimenz cu un persona. E expresionnan di Bryan a pone hopi hende nan cara cambia. Jimenez a expresa cu el a mata 15 otro hende cu ta perdi.
ARUBA NATIVE por a compronde cu Bryan Jimenez a admiti di a asesina Sergio. Segun ley ora ta mata un hende premetida (planea) esey ta bira asesinato. E asesino tambe a expresa di a mata 15 otro hende cu ta dera.
SOSPECHOSO A BIRA TESTIGO IMPORTANTE
Tratamento di e caso tabata diabierna henter mainta te den oranan di merdia. Awe ta publica parti di e tratamento cu a hala atencion. Hues a mustra cu investigacion di Recherche a mustra cu un homber P. ta usando e cellular di Sergio, cu a haya sin bida banda di parke di Avestruz riba 23 December 2023. Recherche a bay detene P. como sospechoso di e asesinato. Durante interogacion, P. a bisa cu ta Jimenez a mata Sergio y cu segun Jimenez, ta Jennifer a paga Jimenez pa mata Sergio. Despues di a asesina Sergio, Jimenez a duna P. e simcard di e cellular di Sergio y Jimenez a keda cu e cellular. P. a bisa Recherche cu Jimenez a bis’e cu el a choca Sergio mata. P. a declara cu Jimenez a yam’e den oranan laat di anochi, pa busk’e na Noord. Ora el a busca Jimenez y hib’e cas, Jimenez a cont’e cu el a caba di mata Sergio, choca y pasa auto riba dje banda di e parke di Avestruz. Jimenez a cont’e cu Sergio a busk’e na su cas y nan a sali. P. a bisa cu Jimenez a coy varios cos di Sergio y sconde tras di su cas. Hasta cu Jimenez tabata hunto cu Jennifer y nan a bay check na bancomatico si tin placa riba Sergio su cuenta. El a bisa cu Jimenez a usa e auto di Sergio, e Mitsubishi, pa pasa auto riba Sergio.
JIMENEZ TA BISA CU EL A MATA 15 OTRO HENDE
Polis a bay pone mike scondi den auto di Jimenez pa scucha combersacion. P. tabata den auto cu Jimenez. Recherche tabata scucha y graba ora nan tabata papia di e matamento y cu Jimenez a bisa cu el a mata Sergio su so. El a bisa cu el a choca Sergio mata y pasa auto riba dje. Jimenez a bisa cu Jennifer mester paga awor. El a bisa cu Jennifer a paga un adelanto di 200 florin. Jimenez a bisa cu Jennifer no por bisa nada sino e lo basha abao y nan dos lo bay sera. P. a bisa Jimenez ta con e por a mata Sergio asina. Jimenez a bisa cu Sergio no ta e promer cu el a mata. El a bisa cu tin 15 hende cu el a mata tempo cu e tabata forma parti di un gang y cu e hendenan aki ta perdi. Jimenez a bisa cu nan ta dera na Arikok.
E declaracion aki ta duna impression cu Jimenez ta un asesino mes. Mas detayes tocante di e 15 hendenan cu el a mata no a wordo bisa durante tratamento di e caso. Por bien ta cu esaki ta un parti cu ainda Recherche lo ta bay investiga si realmente Jimenez a haci e asesinatonan aki of ta djis pa blof el a haci e expresionnan aki. Ta un hecho cu tin hendenan perdi y investigacion lo mustra si enberdad lo tin hendenan dera na Arikok of no.