Oranjestad, 11 September 2024 – ELMAR ta anuncia cu dia 17 di September nan lo presenta na comunidad nan prome actividad di CONTACTO CU BARIO. E prome edicion di CONTACTO CU BARIO lo tuma lugar den MFA Noord diamars 17 di september cuminsando for di 7or pa 9or di anochi.
Clientenan di ELMAR y Comunidad henter ta cordialmente invita pa un anochi di informacion unda representantenan di ELMAR lo duna informacion tocante e ultimo desaroyonan di e Plan Acelera di Mantencion, Procedura pa aprobacion pa conecta e instalacion di solar panel na e red di coriente, y ‘Compronde bo cobransa miho’. CONTACTO CU BARIO ta un anochi informativo ideal pa habitantenan di e Barionan na turno por haya informacion y haci pregunta tocante di e temanan. Por ehempel esnan cu tin interes pa instala Panelnan Solar na cas of negoshi pero no sa unda pa cuminsa of no sa bon con e proceso ta bay. Participante lo haya informacion di expertonan di ELMAR riba e proceso di kico por y kico no por y na cual instancianan mester acudi pa completa e instalacion di panelnan solar.
Ademas di esaki, pa esnan cu ta haya dificultad pa compronde nan cobransa di coriente, e representante di ELMAR lo duna un splicacion detaya. Representantenan di Customer Service lo t’ey pa conecta cu e cliente pa clarifica cualkier asunto cu ta regarda comprension di nan cobransa, por dirigi cualkier pregunta na nan.
Contacto cu Bario lo bira un serie di actividad caminda cu ELMAR kier conecta cu e comunidad di cada bario pa haya sa mas di e desaroyonan den e barionan y pa mehora servicio na e comunidad. Pueblo di Noord ta keda cordialmente invita pa diamars 17 di September pa 7 or di anochi pa yega na MFA Noord pa e prome Contacto cu Bario.
