Djabièrnè mainta e aspirantnan di e estudio básiko pa bira agente di Wardakosta (Basis Opleiding Kustwacht (BOK) 2024, a marcha drenta Marinebasis Parera despues di kuater siman intensivo di entrenamentu, e asina yama ‘Samen Sterk weken’. E 20 aspirantnan di Aruba, Kòrsou i Sint Maarten a pasa e simannan duru di introdukshon i e ehersisio final.
Durante e simannan di introdukshon e hòbennan pa kuater siman largu, bou di guia di nan instruktornan di Wardakosta a sigui lès den klas i a eksperensha diferente kampamentu introduktorio. Durante e kampamentunan e aspirantnan a marcha basta kilometer, landa hopi, kushiná nan mes, konstruí vlot pa riba laman i tambe a kompletá ehersisionan anfibio.
Nan ehersisio pa finalisa e simannan di introdukshon a kuminsá djawebs anochi i terminá djabièrnè mainta 8’ or. Pa e ehersisio final e aspirantnan a marcha i a rema riba laman ku destino final Marinebasis Parera riba djabièrne mainta. Na Marinebasis Parera e aspirantnan a keda risibí ku un kaluroso aplouso na entrada di parti di nan futuro koleganan di Wardakosta i otro koleganan di e base na Parera. E kuater simannan di introdukshon ta marka inisio di e Estudio Básiko di Wardakosta ku ta dura 1 aña. E inisio di e entrenamentu ta marka tambe e momentu di un kolaborashon estrecho entre Wardakosta i e ‘Opleidingsinstituut Rechtshandhaving & Veiligheidszorg’ (ORV) kual ta drenta un fase nobo kaminda e aspirantenan di BOK 2024 ta sigui e entrenamentu rekonosé di e estudio di SBO-2 ‘Junior Bemanningslid Kustwacht’ kual lo ser brinda pa ORV i Wardakosta. Otro siman e aspirantnan ta bai kuminsá ku e módulo básiko di abilidat, ku ta inkluí entre otro prome ousilio (EHBO) i abilidatnan di tiru, ku lo bai dura 8 siman. Wardakosta ta deseá e aspirantnan hopi éksito.
