ORANJESTAD: Minister di Enseñansa y Deporte Endy Croes a haci un bishita oficial na Cacique Macuarima School na Santa Cruz, den cuadro di implementacion di siña lesa y skirbi na Papiamento den klas 1 y Hulandes den un acercamento nobo cu ta pas cu nos contexto na Aruba. Cabesante Rachel Croes Caster a ricibi e mandatario di Enseñansa, directora suplente di Departamento di Enseñansa Aruba (DEA), staffunctionaris di Stichting Katholiek Onderwijs Aruba SKOA y consehero di Ministerio di Enseñansa cu un caluroso bonbini. Minister Endy Croes a indica cu tabata impresionante pa mira e intercambio entre e maestra y e alumnonan. Directora suplente di Departamento di Enseñansa Aruba (DEA) Sra. Gina de Kort a indica cu ta bunita pa wak e entusiasmo di e maestronan pa duna les, unda e muchanan ta participa activamente. Staffunctionaris di SKOA Sra. Maybeline Jereisa Biesum a indica cu e ta contento di wak cu e maestronan di klas 1 ta duna les di nos dushi Papiamento cu hopi entusiasmo y cariño. Fuera di esaki, Sra. Maybeline a indica cu esaki sigur ta un innovacion hopi importante pa nos pais, paso idioma ta parti di nos identidad y sigur SKOA ta sostene e echo cu nos muchanan tin cu siña nan idioma materno y cu e base ey por siña otro idiomanan. Sra. Maybeline a expresa cu e ta contento di mira cu Papiamento a haya su luga den enseñansa. Pa finalisa, Minister Endy Croes ta gradici cabesante Rachel Croes Caster y e maestronan pa e tremendo trabou cu nan ta haciendo y ta desea e team di Cacique Macuarima School hopi exito.