ORANJESTAD – Diamars den Corte a trata e caso di medida di orden cu Fundacion Corporacion Con Animo (CCA) a cuminsa contra Gobierno, pa para e decision di Gobierno.
Ta asina cu Hues a rechaza e peticion di CCA, pendiente e caso sumario cu tambe CCA a cuminsa contra Gobierno.
ARUBA NATIVE por a compronde cu ta reina un preocupacion entre famianan di e patientnan Arubiano interna na Fundacion Corporacion Con Animo na Colombia. Esaki pasobra Gobierno a manda un Decreto Ministerial pa tur e patientnan na e centro cu Gobierno a stop relacion cu Corporacion Con Animo (CCA) y cu pa e siman aki tur mester bolbe Aruba.
Ta asina cu CCA ta tratando patientnan cu ta exigi un cuido compleho psychiatrico cu no por haya tratamento den Respaldo. Por a compronde cu tin mas cu 10 patient interna na Colombia cu a base voluntario a bay tuma tratamento y Gobierno ta paga pa esaki.
CASO PA PONE MEDIDA DI ORDEN
Ta asina cu abogado mr. Canwood cu ta representa CCA a cuminsa un caso pa Hues pone medida di orden contra Gobierno pa para e Decreto Ministerial. Tratamento di e caso a tuma lugar Diamars, caminda mr. Canwood a pidi Hues pa pone un medida di orden mientras cu CCA ta cuminsa un caso sumario contra Gobierno. Despues di tratamento di e caso, Hues a rechaza e peticion pa medida di orden.
CASO SUMARIO
Ta asina cu abogado mr. Canwood, a haci peticion caba pa e caso sumario pero ainda no tin un fecha stipula. Por a compronde cu aparentemente Gobierno a haya informacion cu tin patientnan ta wordo mal atendi na e centro. Esey ta e motibo cu Gobierno kier para e relacion cu tin cu CCA. CCA no ta di acuerdo cu e decision di Gobierno pasobra CCA ta haya cu e patientnan ta haya e atencion debido.
PATIENTNAN NO KIER BIN BEK
Por a compronde cu hopi famia na Aruba ta preocupa cu e decision di Gobierno pasobra nan ta haya cu no tin un centro cu realmente lo por duna e tratamento cu CCA ta dunando. Gobierno a laga sa cu lo parti e patientnan na diferente instancia na Aruba y eventual na Curacao tambe.
Ta asina cu Gobierno a stipula cu pa Diabierna awor 6 September 2024, e patientnan mester ta bek na Aruba. Por a compronde cu tin patientnan cu ta nenga di bin bek.
Por a compronde cu e patientnan tin e derecho di apela contra e Decreto Ministerial. Esey lo bira un caso LAR. Tempo lo bay mustra si esey lo tuma. Tambe ta pendiente di e caso sumario.