No tin un coneccion entre uso di telefoon celular y un riesgo mas halto di cancer di celebro, segun un revicion encarga pa E Organisashon Mundial di Salubridad di e evidensia disponibel publica rond di mundo.
A pesar di e aumento enorme den uso di tecnologia sin cable, no a haya un aumento correspondiente den incidencia di cancer di cerebro, den e revision publica diamars. Esaki ta conta asta pa personanan cu ta hasi yamada largo of cu a usa celular pa mas cu un decada.
E analisis final a inclui 63 estudio for di 1994 te cu 2022, evalua pa 11 investigador for di 10 pais, incluyendo e autoridad di proteccion radiologico di e gobierno australiano.
E trabou a evalua e efectonan di radiofrecuencia, usa den telefonnan celular, como tambe den television, monitornan pa baby y radar, co-autor Mark Elwood, profesor di epidemiologia di cancer na Universidad di Auckland, New Zealand, a bisa.
“Ningun di e preguntanan principal cu a wordo studia a mustra mas riesgo”, e la bisa. E re-evaluacion a analisa cancer di cerebro den adulto y mucha, cancer di glandula pituitaria, glandula saliva y leucemia, y e peligernan relaciona cu uso di telefonnan celular, base station of transmisor, y tambe exposicion ocupacional. Otro tipo di cancer lo ser informa separadamente.
E revision ta sigui otro trabounan similar. WHO y otro organisacionnan internacional di salud a bisa anteriormente cu no tin evidencia definitivo di efecto adverso pa salud pa e radiacion uza door di telefonnan celular, pero a pidi mas investigacion. Actualmente e ta clasifica como “posiblemente cancerigeno”, of clase 2B, pa e International Agency for Cancer Research (iarc), un categoria uza ora e agencia no por descarta un posibel link.
E advies groep di e agencia a pidi pa e clasificacion ser reevalua mas lihe posibel door di e datonan nobo for di su ultimo evaluacion na 2011.
E evaluacion di WHO lo keda publica den e prome cuartal di e aña venidero.