Oranjestad- E team di Wings of Hope (WoH) na Aruba Airport Authority N.V. (AAA) ta masha orguyoso di por a regala Graf von Zinzendorf School (GVZ) un total di seis smartboard riba diahuebs 29 di augustus 2024.
Wings of Hope (WoH) di AAA ta enfoca pa ehecuta diferente proyecto socialmente responsabel cu e Sustainable Development Goals di Nacionnan Uni como su principio di guia pa asina contribui na bienestar, desaroyo y sostenibilidad di e comunidad di Aruba. WoH di AAA a colabora cu Departamento di Enseñansa Aruba (DEA) pa identifica e scolnan cu tin mester di sosten y a base di e necesidadnan di e scolnan na Aruba, DEA a recomenda GVZ pa ricibi e donacion.
Durante un reunion cu GVZ, WoH a haya sa cu GVZ tabata den proceso pa muda pa un localidad nobo pasobra caminda nan ta actualmente no ta uno sigur pa por cumpli cu e metanan educativo. Maske cu WoH no por yuda pa cu e renobacionnan, parti di e plan di e scol ta pa implementa tecnologia innovativo p’asina mehora nan calidad di educacion y ambiente pa siña (SDG 4). Den colaboracion cu un proveedo local y dilanti di e alumnonan di klas, docente y e miembronan di WoH, a haci entrega oficial di seis screen smartboard pa e scol. GVZ a expresa nan gratitud door di prepara un cancion, dibuho di Wings of Hope pinta door di e alumnonan mes y a entrega un certificado di aprecio na WoH.
Wings of Hope di AAA ta masha orguyoso di por contribui na un otro scol pa medio di tecnologia innovativo y di e manera aki ofrece e alumnonan un manera moderno y interactivo pa sigui siña. “Wings of Hope tin como meta pa ehecuta varios proyecto exitoso pa medio di nos plan anual y di e manera aki contribui na diferente SDG. Mirando cara di e studiantenan yena cu felicidad y gratitud ta loke ta haci nos mas satisfecho ainda”, asina Christine Kaarsbaan-Leo, Sustainability & Health Manager, a enfatisa.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 77% ta di Merca y Canada, 15% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport.
