Oranjestad-Aruba
Piscadonan ta perde nan bida riba lam
Ayera e Centro di Operacion Maritimo di Wardacosta a haya un melding di un boto di piscado local cu tawata perdi riba lama. Abordo di e boto tawata tin dos homber local cu a sali pa lama diaranson mainta.
E hombernan mester a regresa cas diaranson anochi, pero no a regresa cas. E famianan di e piscadonan perdi a tuma contacto cu Wardacosta pa haci un busceda pa e dos hombernan. Mesora despues di e melding, Wardacosta a lansa un helicopter cu a start un busceda aereo buscando e hombernan riba e boto Mila panort di Aruba.
Diahuebs atardi a haya un vest di salbabida, un tas y un tanki di gasolin na altura di Bachelor Beach, cu ta kere cu tawata pertenece na e boto Mila cual tawata perdi. Wardacosta tambe a dirigi un drone y e cutter Jaguar pa asisti cu e busceda.
E busceda a keda anula den oranan di anochi debi na e skuridat. Diabierna mainta tempran a cuminsa cu e busceda bek na cual momento e drone a constata un curpa cu no tawata duna señal di bida na Bachelor Beach. Despues di un rato, a constata un curpa mas cu no tawata duna señal di bida riba e mesun beach.
E curpanan cu no tawata duna señal di bida a wordo identifika komo e dos piscadonan local perdi. E curpanan a wordo entrega na Cuerpo Policial Aruba pa mas investigacion. Wardacosta ta desea famia y amigunan di e hombernan hopi forsa.