Gobierno di Aruba hunto cu Stichting Hunto a bati e bel pa revela trabounan di renobacion, y expansion di Centro Colorado
ORANJESTAD – Diaranson anochi Prome Minister Evelyn Wever-Croes tabata presente na e re-apertura di e edificio di Centro Colorado su facilidadnan. Den compania di Minister di Asuntonan Social y profesionalnan di Stichting Hunto, a bati bel pa revela e trabaonan di renobacion, expansionnan y vision di Centro Colorado. Prome Minister a indica cu e edificio tabata den hopi mal estado na 2019, y despues cu e Raad nobo a tuma over a cuminsa cu cambionan. Durante nan bishita nan por a admira e trabounan haci y haya un bista riba tur e trabounan cu falta ainda den e añanan cu ta sigui.
Desde cu Gabinete Wever-Croes a drenta Gobierno, a pone prioridad na salud mental, escalando e tema aki na nivel di crisis, dunando asina e atencion necesario. Prome Minister a expresa cu cada bishita cu e haci na Stichting Hunto ta yen’e di emocion, pasobra nan nomber ta papia pa nan trabounan haci, na unda nan a trece tur hende den e veld di salud mental hunto pa combersa riba e tema, compronde, traha y colabora cu otro cu e solo meta di bin cu solucionnan pa e tema di salud mental.
“Mi ta tribi di bisa den tur humildad, si tabatin un Gobierno y un minister cu di berdad a duna hopi atencion na e tema di salud mental, esey ta Gabinete Wever-Croes. Minister Dangui Oduber a cuminsa traha riba e tema aki despues di pandemia, y awor Minister Rocco Tjon tin e cartera y ta traha cu hopi pasion y dedicacion pa yuda esnan cu ta bringando e malesa cruel aki di salud mental y adiccion.
Pese’y mi kier gradici Minister Rocco Tjon y su ekipo cu ta su sostene, pa nan dedicacion y determinacion den traha hunto na bienestar di salud mental. Tambe cada empleado cu ta traha dia den dia afo pa yuda esnan cu ta sufri di e malesa aki.
Mi ta lamenta di scucha oposicion ta critica y crea percepcion cu nada a wordo haci riba e tereno di salud mental. Esaki aboslutamente no ta berdad y ta duna un menosprecio na e trabou duro desplega pa cada empleado. Como Prome Minister di pais Aruba, mi kier sigura cada un di boso, cu nos den Gobierno si ta wak e trabou duro cu boso ta haci, nos ta apreci’e y nos ta desea cada un di boso hopi forsa pa sigui cu e bon trabou”, Prome Minister a expresa.