SAN NICOLAS (27 di augustus 2024) – Diamars atardi organisadonan di Art Week Aruba a ofrece un conferencia di prensa den cual a comparti tur detaye y tambe e ultimo desaroyo rond di e di shete evento di arte di mayor proyeccion riba e isla. E encuentro cu media a tuma luga na Galeria ArtisA den caya principal di San Nicolas y cu proximo siman ta bira e epicentro di expresion artista den su diferente disciplina.
A hiba palabra president di ArtisA y creador di Art Week Aruba, Tito Bolivar hunto cu Derchlien Dijkhoff, Senior Product Specialist di Aruba Tourism Authority como patrocinado principal di Art Week Aruba y tambe Tracey Nicolas, productor encarga cu Art Fashion. Cada un for di nan angulo a duna un splicacion amplio di kico por bay spera entre 2 y 8 di september venidero.
Pa duna inicio na e siman di celebracion expresivo, ta presenta riba dialuna 2 di september y pa prome biaha na Aruba, un asina yama Art Table. Ademas di disfruta di un seleccion di snacks y biña, tur esunnan nan mesa lo crea un obra di arte colectivo. Un anochi unico caminda ta come na aire liber, mientras cu activamente y cu guia di artista local, lo crea un pieza di arte.
Diaranson 4 di september ta turno di Art Fashion cu ta un anochi fabuloso di moda. A pidi ocho diseñador local e internacional pa activa y a traves di moda rebeldia pa genera un cambio. Art Week Aruba ta sumamente contento di por conta cu e diseñadornan Akemi Nakamura y Flow for di Colombia, Jeremiah Richardson di Hulanda, Jolie Duzon di St. Maarten, Sway di Corsou y Celeste Richardson, Elisa Lejuez y Gionina Engelhardt di Aruba.
E siman ta culmina di un manera grandioso cu e develo di obranan di mas di 100 artista, tanto den galeria, riba caya, mural, instalacionnan y mas. Fuera di esey lo crea un ambiente total di musica y gastronomia cu presentacion en bibo ademas di pop up di restaurants.
Pa mas informacion, programa detaya y tambe pa cumpra tickets, por bishita www.arubaartfair.com of artweekaruba.com , na stacionnan di Citgo, D Shop, The Specialist y tambe a traves di Pay.aw. Art Week Aruba ta un produccion di ArtisA cu cooperacion di Aruba Tourism Authority, Prins Bernhard CultuurFonds, Mondriaan Fonds, Eagle Aruba Resort, La Cabana Beach Resort, Aruba Marriott Resort & Stellaris Casino, Tourism Product Enhancement Fund, Radisson Blu, Dunkin Donuts, Hertz, Tur Cos Ta Posibel, L’Oreal Aruba y Romar Trading y Elite Productions, ademas di e colaboracion di tur boluntario y artista.