Aruba Hotel and Tourism Association (AHATA) ta orguyoso di celebra e di 15 aniversario di Vanessa Rasmussen, e asociacion su Manager of Member Services and Administration. Desde augustus 2009, Vanessa a forma un parti esencial di AHATA su team, demostrando constantemente un compromiso ehemplar. Su gran experiencia y dedicacion door di tur e añanan no solamente a fortalece e relacion di AHATA cu su mas di 150 miembronan, pero tambe ta haci’e un gran colega pa tur cu ta traha cune. Vanessa ta un persona cu semper ta cla pa yuda y su team ta aprecia su apoyo, profesionalismo y e energia positivo cu e ta trece na trabou.
Aparte di maneha tur e administracion y servicionan di miembrecia, Vanessa ta orguyosamente forma parti di AHATA su Comision di Medio Ambiente durante hopi aña y ta lidera esfuersonan pa yuda comunidad. Vanessa su lealtad y contribucionnan ta e fundeshi pa e ambiente colaborativo y productivo na AHATA, y sin duda ta yuda e asociacion mantene su posicion clave den comunidad di Aruba.
AHATA su hunta, directiva y miembronan ta expresa nan aprecio profundo na Vanessa pa tur e añanan di servicio y tur e trabou duro cu ta haci pa e asociacion y su miembronan.