Aruba Tourism Authority (A.T.A.) y Aruba Convention Bureau (ACB) ta extremadamente contento di por anuncia premiacion di dos pionero femenino excepcional di Aruba den e industria di MICE cu reconocemento durante di e prestigioso Smart Women in Meetings Awards 2024 na Las Vegas, Nevada. Cu contribucion remarcabel na e sector di Meetings, Incentives, Conferences, and Exhibitions (MICE), Geraldine Coutinho-Meyers y Maoreen Every a wordo reconoci y asina conkista e premio di Industry Leader y Entrepreneur.
Geraldine Coutinho-Meyers, Associate Director of Sales & Events na Hyatt Regency Aruba Resort Spa & Casino ta logra e premio di Industry Leader y ta wordo reconoci pa su innovacion, compromiso y inspiracion. E trayectoria di Geraldine den e industria di MICE a cuminsa na aña 1990, unda cu a hunga un rol fundamental den lansamento di Hyatt Regency na Aruba. Su dedicacion y pasion a wordo ilustra durante e prome bishita di un grupo na e hotel. Aki ta caminda cu su planificacion y anticipacion di e necesidad di cliente a resulta den un experiencia inolvidabel. Alabes, ta di menciona cu Geraldine a fungi como Area Director di Norte America pa Aruba Tourism Authority. Geraldine ta kere firmente den e autenticidad y creacion di un ambiente hospitalario ta uno clave pa un relacion profundo, tanto na un nivel profesional como personal. E siguiente meta ta pa avansa den e rol di Regional Director of Sales & Events, unda cu lo duna apoyo y inspiracion na su ekipo abase di habilidad nan integra di Life Coaching.
Maoreen Every, CIS, CITP, DMCP, Managing Director y COO di ECO Destination Management Services of Aruba, a ricibi e premio di Entrepreneur durante di e ceremonia aki. Maoreen a wordo reconoci pa su habilidad nan organisatorio, creatividad, y espirito di colaboracion. Su momento di “A-HA” a yega na momento cu e oportunidad a presenta pa duna un charla na Universidad di Aruba. Aki ta caminda a comparti su conocemento amplio den e industria di MICE, y e importancia di colaboracion local. Maoreen ta dedica na fomenta un ambiente positivo y dibertido, enfatisando e poder di humor y animo den e proceso di contrui cu relacionan fuerte y respetuoso. Pa aña 2027, y den conexion di 40 aniversario di su compania, Maoreen a pone como meta ambisioso pa expande di su ekipo, logra diferente certificacion, y ricibi reconocemento internacional.
Geraldine Coutinho-Meyers y Maoreen Every ta marca historia como e prome pionero nan femenino den Caribe pa ricibi un nominacion, sigui pa premiacion durante di Smart Women in Meetings Awards. Esaki ta sirbi como un refleho y florecemento continuo di e industria di MICE na Aruba. E logro nan aki ta enfatisa e compromiso di e isla pa cu exelencia, innovacion, y crecemento sostenibel den e sector di reunion y evento.
A.T.A. y Aruba Convention Bureau (ACB) ta felicita Geraldine y Maoreen pa nan un reconocemento mereci. Boso exito ta un inspiracion na futuro lider y futuro generacion di Aruba. Masha Pabien!
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
Tocante Aruba Convention Bureau
Aruba Convention Bureau (ACB) como parti di A.T.A. ta dedica na promove Aruba como un destinacion atractivo pa organisa reunion, biahe incentivo, conferencia, y exibicion (MICE) na companianan internacional. Pa medio di socionan strategico y servicio di calidad mundial, ACB tin como meta pa atrae y sostene eventonan cu ta contribui na crecemento y desaroyo economico pa Aruba.