Te cu awe Gobierno di Aruba no a manda ningun estudio actual di Aruba su ‘carrying capacity’.
Nos sa cu Gobierno a publica cu Aruba tin un escases di trahado, consecuentemente minister Glenbert Croes a bin cu un ‘maneho nobo’ unda cu e ta habri porta pa miles di trahadornan migrante bin biba y traha na Aruba. E pregunta ta ‘Kico ta gobierno di Aruba su pensamento y vision di Aruba su carrying capacity pa loke ta nos poblacion, nos turismo y e presion cu e cantidad di hendenan cu lo bin aserca lo pone riba nos infrastructura, nos vivienda, educacion, salubridad, etc?
Si Gobierno na e momentonan aki no tin un estudio ni vision cla pa Aruba p’e proximo añanan, ta con bo por habri porta pa miles di hende sin haci un estudio actual di capacidad di carga di nos pais y sin presenta y comparti esaki cu Parlamento di Aruba? N’e momentonan aki ya nos poblacion tin hopi presion y keho riba por ehempel listanan largo di espera pa por ehempel e parti medico, lista enorme di espera na FCCA pa loke ta vivienda, etc.
Con e listanan di espera lo bira awor? Miles di persona lo bin y unda nan ta bay biba si tin escases di vivienda?
A base di e maneho di free for all di Minister Glenbert Croes, mi a haci pregunta por escrito dirigi na minister di Labor, Integracion y Energia Glenbert Croes. Minister Croes a introduci su ‘maneho nobo’ (nieuwe beleidsinstructies) desde luna di augustus 2024 y Parlamento di Aruba no a ricibi nada pero si por a tuma nota riba medionan social cu hasta presentacionnan ta wordo duna.
Parlamentario Tromp (MAS) a haci e siguiente preguntanan:
- Cu cual organizacionnan y instancianan Minister a reuni y intercambia prome cu a yega na e
maneho nobo aki?
- Minister tin sosten pa e maneho nobo di parti stakeholders? Si e contesta ta afirmativo,
cualnan ta tur e stakeholders aki?
- Minister ta haci distincion entre “reeds aanwezige migranten” y “nieuwe migranten” segun e
fecha cu nan a drenta Aruba legalmente. E distincion segun Minister su maneho nobo pues ta entre e migrantenan cu t’ey caba na Aruba for di prome cu 1 di januari 2024 y e migrantenan nobo cu ta ensera tur stranhero cu a drenta Aruba despues di 1 di januari 2024. E fecha di entrada ta e unico criteria cu Minister ta usa pa distingui e 2 categorianan aki?
- Minister por splica dicon Gobierno no ta duna ningun balor na estudio como condicion pa
por hanja un permiso na Aruba pa tur migrante cu ta riba nos isla?
- Pakiko no ta importante pa Gobierno cu e migrante por prueba ki tipo di ensenjansa of
certificado of diploma e tin pa e por hanja un permiso pa un funcion?
- Pakiko Minister a pone como maneho nobo cu pa e migrante cu a yega recien no tin nodo di
haci ningun arbeidsmarkttoets?
- Con Gobierno y eventual stakeholders a yega na e decision cu ta garantisa permiso basta cu e persona sigui y termina 1 curso di algun siman na Ensenjansa pa Empleo?
- Dicon Minister no ta laga check mas di antemano si tin personanan cu ta bibando na Aruba
cu tin e studio of preparacion pa haci e trabao?
- Pakiko tur hotel cu tin mas cu 50 kamber mesora ta hanja aprobacion di Minister pa
permisonan, sin tin nodo di cumpli cu cierto rekisitonan?
- Kiko Gobierno a haci pa stimula nos studiantenan y profesionalnan den exterior pa atrae
nan pa bin biba y traha na Aruba? (y mi no ta referi aki na e “Ban Topa” di Arubahuis).
- Minister por confirma si Gobierno a haci un studio di e capacidad di carga di pais Aruba
actual y pa e proximo anjanan nos dilanti? Si e contesta ta afirmativo, por entrega y presenta
esaki na Parlamento? Si e contesta ta negativo, ta con por a yega na e maneho y decisionnan tuma?
E aclaracionnan aki ta crucial pa compronde miho e implicacionnan di e maneho migratorio nobo y su impacto den comunidad. E contestanan di Minister Glenbert Croes lo ta fundamental pa atende e inkietudnan y sigura e transparencia den e maneho migratorio na Aruba.