Gobierno di Aruba ta duna reconocemento na e
ORANJESTAD – Diasabra mainta Prome Minister Evelyn Wever-Croes a acompaña Minister di Deporte Endy Croes pa duna reconocemento na e mucha muhenan di e seleccion Girls U15 cu a logra e titulo maximo di e torneo di Concacaf teni na Aruba. Presente dilanti Bestuurskantoor tabata e mayornan, famianan y amigonan, como tambe e presidente señor Randolf Lacle y representantenan di Aruba Voetbal Bond (AVB).
E mucha muhenan a wordo yama un pa un padilanti, na unda nan a cana riba tapijt cora pa asina haya nan reconocemento. Di parti di Gobierno di Aruba, nan a ricibi un Medaya di 4D, mientras cu di AVB tambe nan a ricibi un bunita regalo. Prome Minister a expresa cu e mainta aki sigur tabata un momento di orguyo y alegria, no solamente pa e mucha muhenan ganado, sino pa Aruba completo cu a sa di biba cada momento cu nan durante e weganan.
Prome Minister durante su discurso a dirigi na e muchanan cu un orguyo inmenso, expresando cu loke nan a logra ganando e titulo campeon, no ta solamente un titulo di un campeonato, sino un demostracion, cu nos mucha muhenan di Aruba por den futbol, si nan simplemente pone como meta den nan mente.
“Mi ta gradici cada mayor, y famia cu semper a sostene cada un di e mucha muhenan balente aki. Pasobra ta danki na nan sacrificio e muchanan aki awe ta asina exitoso. Un danki na e coachnan pa nan dedicacion na train e muchanan, na Aruba Voetbal Bond (AVB) y na tur esnan cu a haci esaki posibel.
Por ultimo mi ta gradici Minister di Deporte Endy Croes, cu a pone su curason den haci deporte na Aruba grandi. Apesar cu e tin e cartera pisa di enseñansa, el a sa di duna e debido atencion na deporte. Danki na su trabou y e inversionnan haci den stadion, FIFA a permiti e weganan aki tuma luga na Aruba y comunidad completo por a disfruta e campeonato aki na Aruba mes. Mi ta sumamente orguyoso di ta parti di Gabinete Wever-Croes, cu ta traha cu curason, y ta logra cosnan grandi pa deporte. Masha pabien na tur nos muchanan”, Prome Minister a expresa.
