Gobierno di Aruba ta anuncia un paso importante den e esfuersonan pa proteha bienestar di nos animalnan domestico, den cuadro di e maneho pa Bienestar di Animal Aruba (MBAA) 2024-2029. Durante un rueda di prensa dialuna 26 di augustus 2024, Minister Arends a revela cu e prome version di e ley “Landsverordening Dierenwelzijn ” a yega Ministerio y ta den fase di consulta.
E ley nobo na bienestar di animal ta enfoca riba tres obhetivonan principal:
- Proteccion di Animalnan Domestico: Garantisando siguridad y bienestar di nos mascota na Aruba.
- Penalidad y sancion pa abusador: Estableciendo medida stricto pa responsabilisa esnan cu ta comete crueldad of negligencia.
- Structuracion di posesion di animal: Creando un sistema formal pa posesion di mascota pa garantisa cuido y responsabilidad apropia.
E ley ta consisti di varios componentenan clave pa aborda bienestar di animal den un structura legal.
- Registracion Obligatorio via Microchip: Tur mascota lo mester ta registra cu un microchip.
- Sterilisacion Obligatorio: Doñonan lo tin cu sterilisa nan mascota.
- Reglamento pa Criadornan (Breeders): Criadornan lo mester registra y cumpli cu standarnan stricto.
- Responsabilidad di Cuido di Animal: Reglamento nobo lo stipula cuido apropia y aclaracion di responsabilidad di doño di mascota.
Aplicacion di e ley lo tuma luga den dos nivel:
- Handhaving Administrativo: Ministerio di Naturalesa lo ta encarga di sistema di registracion y monitorisacion di cumplimento cu e ley pa garantisa bienestar di animal. Inspectornan den e ministerio lo wordo ekipa pa enforsa e ley, tareanan cu anteriormente tabata bou di KPA (Cuerpo Policial di Aruba).
- Handhaving Penal: Den casonan severo di abuso, crueldad y negligencia grave di animal, e proceso hudicial lo keda bou mando di KPA y OM (Ministerio Publico). Lo aplica e Strafrechtelijk Handhaving. Ministerio ta traha di cerca cu autoridadnan pa garantisa cu esnan cu comete infraccion lo rindi cuenta na husticia rapidamente.
Minister Arends a anuncia tambe cu e ley pa bienestar di animal ta drenta fase di consulta publico. Tur stakeholders, incluyendo veterinario, KPA, DLVV, fundacionnan y miembronan di comunidad ta invita pa duna nan opinion y sugerencia. Esaki lo garantisa cu e ley ta refleha e necesidadnan di tur esnan envolvi den proteccion di animalnan na Aruba.
Cuminsando dia 2 di September 2024, e propuesta di ley lo ta disponibel pa revicion riba publico.aw bou di tab “Consulta”.
Adicionalmente, dos consulta publico lo tuma lugar na MFA Savaneta y MFA Paradera, unda miembronan di comunidad por yega personalente pa ricibi informacion y duna nan input.
- MFA Savaneta: 4 di September 2024, 6:00 PM – 7:00 PM
- MFA Paradera: 6 di September 2024, 6:00 PM – 7:00 PM
E ley nobo ta bai man den man cu un campaña di conscientisacion cu ta enfoca riba educa comunidad riba importancia di ser un doño responsabel y tene empatia pa nos animalnan. E meta di campaña aki ta promove un cultura di cariño y responsabilidad pa nos mascota. Ministerio di Naturalesa a colabora cu artista local Ty Figaroa pa asina yuda comparti e mensahe pa stima nos mascotanan y ta un doño responsabel.
Minister Arends ta enfatisa cu mascota ta parti di famia. Bo cuido y amor ta haci tur e diferencia den su bida. Stima bo mascota!