Oranjestad – Diasabra ultimo, Augustus 24, 2024, Kiwanis Club of Palm Beach a celebra su 40 aña di existencia. Pa haci e celebracion aki mas special, a combina esaki cu e “Award Night”, cu ta un evento annual, caminda ta reconoce miembronan cu a destaca durante e e aña Kiwanistico, den e caso aki 2023-2024.
Presidente Onasito “Chito” Thiel a habri e anochi dunando un bon bini na tur miembro y invitadonan na e anochi mahestuoso aki. Den e prome parti di e anochi special aki President Chito a otorga certificado di aprecio na un grupo di miembro cu a destaca pa nan aporte na e club y na comunidad. A cera e parti aki cu dos reconocemento hopi importante. E prome ta e “Distinguished Service Award” cu a wordo otorga na “Past President” (PP) Richard Roy pa su tremendo aporte na e club y comunidad y e di dos reconocemento, e “Kiwanian of the Year Award” a wordo otorga na “Distinguished President” (DP) Franklin Hoevertsz, kende alabes ta Presidi e Comite pa e “Terrific Kids Service Leadership Program”.
1
E di dos parti di anochi a wordo dedica na e celebracion di e di 40 aña di existencia di Kiwanis Palm Beach. Presidente Chito a habri e parti aki cu un discurso caminda a menciona proyectonan, trabounan comunitario y e logronan mas importante di e ultimo 40 aña. E clausura di e parti aki a keda den man di Past Lieutenant Governor (PLG) Gavril Mansur, caminda e a navega tur presente den e historia elocuente di e club, for di e inicio te caminda cu e ta awor.
\
E anochi no por a wordo cera sin e reconocimento di e “Legion of Honor”, cu ta miembronan cu 25 aña, mas incrementonan di 5 aña, of mas di servicio como miembro di e club. Un total di diesseis (16) miembro a ricibi e reconocimento aki.
2
E celebracion a tuma lugar den e ballroom di Eagle Aruba Resort, cu ta den mesun edificio di Double Down Sports Bar & Grill Restaurant, durante un cena ameno cu presencia di miembronan y invitadonan special.
Kiwanis Palm Beach ta forma parti di “Kiwanis International”, cu ta un organizacion caritativo mundial, dedica na haci nos mundo mihor door di cambia un comunidad pa medio di un mucha cada bes. Pa mas informacion por bishita nos pagina di Facebook riba: www.facebook.com/kiwanispalm beacharuba
— FIN —
3