A dialoga riba varios punto di interes en comun
ORANJESTAD – Diahuebs 22 di augustus Prome Minister Evelyn Wever-Croes tawatin e reunion trimestral cu Camara di Comercio (KVK). Manera ta indica, e reunion aki ta tuma luga cada 3 luna unda ta dialoga riba puntonan di interes y preocupacion di Camara di Comercio, sector comercial y tambe di Gobierno.
Inversionnan den proyecto
Un punto crucial cu a bin dilanti ta e echo cu Gobierno a crea espacio financiero y ta alocando fondo structuralmente pa inversionnan den presupuesto di pais Aruba. Ta alocando fondo pa inversionnan den diferente proyecto entre otro pa drecha careteranan. Awor ta dialogando hunto cu Camara di Comercio y otro stakeholders comercial pa yega na inversionistanan y comerciantenan cu por yuda den e realisacion di e proyectonan, y pa esaki Camara di Comercio ta hunga un papel hopi importante.
DIP
Otro tema importante ta esun di DIP (Directie Infrastructuur en Planning), unda Prome Minister a informa cu DIP ta trahando duro pa elimina atrasonan, y por cuminsa wak e ‘luz na final di e tunel’ cu varios trabou cu a wordo haci y atrasonan cu a wordo elimina. Akinan e mandatario a manda su palabranan di gradicimento na e personal di DIP cu ta trahando cu alma y cuerpo riba esaki.
Rijkswet y Groeifonds
Tambe durante e reunion a trata e relacion cu Hulanda, y riba rijkswet cu mester bin pa Aruba por logra haya e interes mas abou riba e debe di Covid. E negosacionnan riba e rijkswet na e momento aki ta riba ‘ambtelijk niveau’ y ta bayendo den bon caminda. Tambe Gobierno ta wardando riba conseho di IMF riba e normanan financiero.
Otro tema cu a trata di Hulanda tawata riba e fondonan cu Hulanda a priminti di pone disponibel pa e islanan, por ehempel e “Groeifonds”. Pa esaki awor mester warda y wak si e Gobierno nobo di Hulanda lo sigui cu ne.
Restructuracion di e aparato gubernamental
Camara di Comercio durante e reunion tawatin hopi pregunta tambe riba trabounan den Gobierno mes. Por ehempel e restructuracion di e aparato gubernamental, e tareanan cu Gobierno mester haci, e antes yama ‘kerntaken- analise’. Aki e mandatario a duna un update di e proyecto cu ta pa restructura e departamentonan di Gobierno pa asina mehora e servicio cu Gobierno ta duna en general.
E-Government
Riba e proyecto di E-Government cu ta e proyecto di digitalisacion, Prome Minister a informa cu na e momentonan aki ta finalisando e contrato cu Estonia, pa asina por inicia cu e proyecto aki mirando cu e fondonan di Union Europeo lo cuminsa drenta durante e proximo lunanan.
Escasez di trahado
Otro reto grandi actualmente di e sector comercial ta e esun di e escasez di trahado. E tema aki tambe recientemente a wordo trata cu ATIA y varios stakeholder comercial. Ta spera cu e maneho di Minister di Labor y Integracion, señor Glenbert Croes duna fruto y yuda alivia e situacion.
“A trata di un bon reunion, unda a dialoga extenso riba puntonan di preocupacion di Camara di Comercio, stakeholders y di Gobierno mes. Na final, e preocupacionnan y tur trabou cu ta wordo haci ta cu e mesun meta, di hiba Aruba padilanti”, Prome Minister a expresa.