SAN NICOLAS (22 di augustus 2024) – ArtisA ta sumamente contento, gradici y honra cu e anuncio cu Minister di Turismo, Sr. Danguillaume Oduber a haci diahuebs mainta caminda Tourism Product Enhancement Fund (TPEF) ta bay di acuerdo pa financia e realisacion di dies mural adicional di arte pa dorna centro di ciudad.
E ehecucion di e proyecto ta den man di ArtisA y lo tuma luga como parti di e proximo Aruba Art Week. Esaki ta e iniciativa originalmente conoci como Aruba Art Fair cu a cuminsa na 2016. Durante prome siman di september awo, artista local e internacional lo ta plasmando nan creatividad y talento na diferente punto di caya principal di San Nicolas y e areanan rond.
Un minimo di dies mural nobo ta bay suma na e 75 ya existente y cu den transcurso di ultimo añanan ta logrando su obhetivo di profila San Nicolas como un atraccion turistico. Prueba di esey ta e cobertura cu e prestigioso medio di comunicacion Mericano The New York Times a duna caminda a batis’e como ‘Art Capital of the Caribbean.’
Prueba cu e muralnan ta generando e efecto deseo ta e cantidad di turista cu ta yega na sede di e Visitors Center solicitando pa participa den e tour peatonal pa admira y conoce miho e obranan di arte. Un bes pariba, e turista ta come, haci compras y diberti, contribuyendo na e economia di San Nicolas. Ta sumamente satisfactorio pa mira tur dia gruponan di turista ta cana den Promenade y esey ta hustamente loke kier sigui fomenta.
Den nomber di ArtisA y Aruba Art Week, Tito Bolivar a expresa su gradicimento sincero y profundo na Minister Oduber, na TPEF y tambe Aruba Tourism Authority pa e sosten cu for di 2018 ta ricibi y ta spera cu por sigui pa asina aporta na e crecemento di e movemento artistico di Aruba y e bienestar general di pariba di brug.
E aña aki Aruba Art Week ta transcuri di 2 pa 8 di september cuminsando cu Art Table, sigui pa Art Talk y Art Fashion. E ta culmina den gran foma cu tres dia di feria di arte den cual mas di 100 artista local e internacional ta participa. Pa mas informacion, programa detaya y tambe pa cumpra tickets, por bishita www.arubaartfair.com y e pagina di Aruba Art Fair riba Facebook y Instagram.
Art Week Aruba ta un produccion di ArtisA cu cooperacion di Aruba Tourism Authority, Prins Bernhard CultuurFonds, La Cabana, Unoca, Marriott, L’Oreal Aruba y Romar Trading, Eagle Resort y Elite Productions, ademas di e colaboracion di tur voluntario y artista.