E siman aki Minister Maduro di Finansa a splica den conferencia di prensa riba e fiansa cu Aruba ta logra cera riba e mercado internacional di capital pa asina por cubri e necesidad financiero di Aruba pa aña 2024. E mandatario a demostra con inversionista internacional ta deposita nan confiansa den Aruba y den e maneho financiero di Gabinete Wever-Croes.
Spread mas abou den historia
Minister Maduro ta informa cu Aruba a haya un spread mas abou den historia pa locual ta fiansa internacional. E spread ta locual inversionista ta cobra pa e risico tuma cu e fiansa, si tin poco risico, e spread ta abou y sin tin hopi risico, e spread ta mas halto. Pa e fiansa haci, Aruba a haya un spread di 250 basis spread points (bps.) E ultimo biaha cu Aruba a bay mercado internacional di capital tabata na aña 2018 y e spread e tempo ey tabata na 308 bps. Remarcabel ta cu pa e debe di COVID-19, Hulanda a duna Aruba un spread di 360 bps, demostrando cu inversionistanan internacional tin mas confiansa den Aruba compara cu e confiansa cu den Reino Hulandes tin den Aruba.
A busca 134,5 miyon florin y a haya 802 miyon florin
Un otro muestra cu inversionista tin confiansa den Aruba ta e hecho cu Aruba a busca e suma di 134,5 miyon dollar riba mercado internacional di capital y a logra haya e suma di 802 miyon dollar fo’i inversionistanan interesa pa fia Aruba placa. Esaki ta 6 biaha mas hopi cu locual Aruba a pidi, demostrando cu inversionista ta interesa y ta confia den Aruba y den e maneho financiero hiba Gabinete Wever-Croes.
Cantidad di inversionista nobo
Ta importante pa menciona cu di e 11 inversionista cu a mustra nan interes pa fia Aruba placa, 9 di nan ta inversionista nobo. Esaki no solamente ta e resultado di e Roadshow teni na juni 2024, unda cu Minister Maduro y su ekipo a presenta Aruba na un grupo grandi di inversionista, pero ta muestra tambe cu e maneho financiero hiba pa Gabinete Wever-Croes ta goza cu e confiansa di inversionista existente y di inversionista nobo.
Algun inversionista tabata kier a presta Aruba ful e suma
Remarcabel ta cu algun inversionista a mustra di tin hopi confiansa den Aruba y tabata dispuesto pa fia Aruba ful e suma di 134,5 miyon dollar. Sinembargo Aruba a scohe pa motibonan strategico pa reparti e suma entre e 11 inversionistanan cu a deposita nan confiansa den Aruba.
Danki pa kere den Aruba
Minister Maduro ta gradici tur persona y instancia cu a yuda pa Aruba por tabata exitoso riba e mercado internacional di capital. E mandatario ta gradici specialmente e inversionistanan internacional cu a mustra nan confiansa den Aruba y den e maneho financiero di Gabinete Wever-Croes. “Masha danki pa kere den Aruba. Nos ta spera cu Aruba por keda den boso mente y cu Aruba por haya un luga den boso curason tambe,” tabata palabranan di Minister Maduro di Finansa pa gradici inversionistanan pa e confiansa demostra den Aruba.
