Den funcion debido di su responsabilidad como parlamentario, mr. Gerlien Croes, un biaha mas mester cuestiona e maneho bruha cu Gabinete Wever-Croes II ta hiba. E biaha aki ta trata di e asina yama LNT, cu ta e Landsverordening Normering Topinkomers, conoci tambe como ‘Wever-Croes Norm’ y cu ta regula e nivel maximo di salario pa director di un compania estatal, instancia publico of semi-publico.
Dos aña a pasa,juni 2022 cu a ley a keda aproba den Parlamento di Aruba y a drenta na vigor.For di prome cu su aprobacion, e ley a conoce hopi critica y rechaso pa diferente motibo.
Como miembro independiente di parlamento y conforme articulo III.17 di e Staatsregeling y articulo 59 di e Reglamento di Estado di Aruba, mr. Gerlien Croes a lansa pregunta den direccion di Minister Evelyn Wever-Croes, como titular Asuntonan General, Integridad y Organisacion Gubernamental, entre otro.
Parlamentario Croes ta cuestiona henter e formulacion, implementacion, funcionamento y control di e ley. Na mas cu un ocasion a expresa publicamente su preocupacion pa e consecuencia cu esaki tin pa e sector den sentido di e retonan cu ta trece pa retencion di liderazgo y talento nobo, pero tambe motivacion pa prestacion optimal di organisacionnan clave pa nos pais.
“Directornan tin varios aña trahando den un ambiente di insiguridad y tension laboral, te na e punto cu algun a opta pa entama caso penal,” Croes a indica referiendo na Algemeen Pensioenfonds Aruba (APFA). Nan argumento, for di prome instante, ta cu APFA no cay bou di e criteria ancra den ley ya cu nan no ta un empresa, ni entidad publico. APFA ta un fondo cu no ta depende di subsidio di gobierno ya cu ta inverti e placa di su miembronan; ni tampoco tin e obligacion legal di duna cuenta na Pais Aruba.
Di otro banda, entidadnan tambe a cuestiona e suma describi den ley pa motibo cu no ta inclui otro entrada cu tambe minister ta ricibi di caha di gobierno, por ehempel contribucion na fondo di pensioen y compensacion pa transporte, etc.
Den su preguntanan, Parlamentario Independiente Croes ta pidi Prome Minister Wever-Croes pa mustra Parlamento di Aruba e Landsbesluit cu a traha pa añadi regla na articulo 8 di e LNT cu ta regula, entre otro aspecto di remuneracion (bezoldiging), prestacion (uitkering) y tambe e control financiero externo di e propio ley su ehecucion. Mescos ta pidi pa mustra parlamento rapport y otro documento cu ta ilustra e desaroyonan cu tabatin den ultimo 2 aña.
Como contesta ricibi ta resulta cu gobierno, 2 aña despues di e aprobacion di e ley, ocasionando hopi incertitumbre, ainda no a traha ningun Landsbesluit necesario pa pone e ley den ehecusion. Esaki ta re-confirma e hecho cu, manera tabata di spera, despues di e aprobacion, nada a keda debidamente regla ya cu Gabinete Wever-Croes a continua cu nan modus operandi di falta di transparencia pa esnan afecta pa e ley. Di nan banda, Minister President ta keda sconde tras di e argumento cu a aprobacion di esaki tawata un exigencia di Hulanda, sinembargo ta resulta cu esaki ta mas bien un otro show politico afectando di manera transcendental e futuro economico y social di Aruba.