“Nos como adulto tey pa scucha boso pa asina nos por traha na realisa cada un di boso soñonan”
ORANJESTAD – Diabierna ultimo na The Venue tuma luga e “Awards Night” pa e miho proyecto di Poder di Hubentud 2024 cu ta celebrando nan di 10 aniversario. Pa cu e proyecto aki, tabata tin un total di 57 hoben nomina di cual varios di nan a cumpli cu 6 siman di seminario pa por yega na nan propio proyecto. E proyecto cu e hobennan aki mester a bin cu ne, mester ta algo innovativo pa comunidad, y e proyecto ganado lo wordo subsidia pa ATHA pa asina e por wordo realisa.
Prome Minister Evelyn Wever-Croes tabata presente na e evento aki, na unda el a dirigi un discurso inspirativo na e tur e hobennan presente. El a expresa cu semper ta wordo bisa, cu nos hobennan ta e futuro di pais Aruba, y p’esey como adulto, nos mester traha cu e pensamento pa logra tur locual ta den nan miho beneficio.
Prome Minister a indica cu e proyecto aki ta demostra e poder, deseo y inspiracion di cada un di e hobennan presente, y ta importante pa tene cada un na cuenta. Tambe, e mandatario a expresa cu usualmente e ta wordo pidi pa duna un discurso y palabranan di inspiracion, pero na e evento aki, ta su persona a wordo inspira pa tur e hobennan cu a traha asina duro haciendo trabounan comunitario, yudando e comunidad y esnan mas vulnerabel, pa logra finalisa nan proyecto.
E ganado di e proyecto di Poder di Hubentud 2024 tabata den persona di e hoben Renderly Trimon, cu a bin cu e proyecto “Separa y Recicla”. E hoben aki, hunto cu 15 hoben mas mester a presenta su proyecto dilanti e huradonan presente, pa asina logra yega na e titulo maximo.
“Un danki di curason na e ekipo dinamico di ATHA pa organisa e evento aki, y sigur un danki na e coordinador incansabel cu tur dia tabata corda mi persona pa no lubida di atende e evento aki. E fruto di boso trabou a ser demostra durante e anochi espectacular aki. Tambe mi ta gradici tur e hobennan participante, pa a tuma e reto y demostra nan poder di hubentud. Nos como adulto t’ey pa scucha boso, pa asina nos por traha na realisa cada un di boso soñonan. Masha danki y hopi exito”, Prome Minister a termina bisando.
