Ultimo prestamo internacional tabata na aña 2018
Den Presupuesto 2024 Parlamento di Aruba a autorisa Minister Maduro di Finansa pa asina busca e fondonan necesario pa cubri e necesidad financiero di Gobierno di Aruba di 567,7 miyon florin pa aña 2024. Ta trata di debenan cu ta madura riba mercado local y internacional. Pa locual ta e debenan riba mercado internacional, Minister Maduro di Finansa ta informa cu Aruba despues di 6 aña a bolbe bek riba e mercado internacional di capital y a logra cera un fiansa di 134,5 miyon dollar na un interes di 6,3% pa paga e debenan cu ta madura.
Ultimo prestamo internacional tabata na aña 2018
E mandatario di finansa ta informa cu e ultimo biaha cu Aruba a busca un fiansa riba e mercado internacional di capital tabata na aña 2018. Gabinete Wever-Croes ta hiba un maneho pa reduci debe, specialmente e debe externo y pa e motibo aki na aña 2019 a refinancia e debenan riba mercado local. Na comienso di e pandemia a bolbe logra refinancia e debenan riba mercado local. Sinembargo durante e añanan 2021 y 2022 di pandemia, Aruba ta logra refinancia e debenan internacional cu a madura cu yudansa di un fiansa di Hulanda. E debenan cu a madura den aña 2023 a wordo financia tambe riba mercado local, ya cu e condicionnan pa Aruba na e momentonan eynan no tabata positivo pa subi e mercado internacional di capital. Awo den aña 2024, cu e meta pa cuida e mercado local, a dicidi pa subi e mercado internacional di capital pa refinancia e debenan cu ta madura den aña 2024.
Resultado fiansa internacional
Cu guia y sosten di e banconan Santander y Citi, Minister Maduro a inicia e proceso pa subi mercado internacional di capital. A busca un tercer rating cerca Moody’s y a logra un di dos investment rating pa Aruba. Na juni 2024 durante un Roadshow, Minister Maduro a bishita diferente inversionista pa presenta e storia di recuperacion financiero y economico di Aruba despues di Covid-19. Despues a haya aprobacion di Conseho di Minister di Reino dia 10 di juni 2024 conforme art 29 Statuut pa busca 160 miyon dollar riba mercado internacional di capital. Dia 22 di juli 2024 Gobierno di Aruba a emiti bono internacional pa e suma di 134,5 miyon dollar y riba 15 di augustus ta logra cera e deal den cual Aruba ta haya un fiansa di 80 miyon dollar den 5 aña na 6,3% di interes y 54,5 miyon dollar den 6 aña na 6,32% di interes. Cu e fiansa aki, Minister Maduro ta logra pa cubri e necesidad financiero di Aruba pa aña 2024 na un manera exitoso.