Un total di 60 mucha local a ricibi un experiencia inolvidabel abordo di Carnival Celebration, un crucero moderno y sofistica opera pa Carnival Cruise Lines. Un dia hopi special, mirando cu pa algun di e muchanan lo ta e prome biaha cu nan ta subi un barco crucero. Un evento cu a cuminsa cu palabranan di Sr. Marc Figaroa, CEO di Aruba Ports Authority (APA) deseando e muchanan un caluroso bon bini. Alabes, a duna palabranan di gratitud na Carnival Cruise Lines den nomber di Gobierno di Aruba, Aruba Tourism Authority (A.T.A.), y Aruba Ports Authority (APA). CEO di A.T.A. a uni su mes na evento y tambe a comparti pensamentonan cu e muchanan y ehecutivonan. Representantenan di Ministerio di Turismo y Salud Publico tambe tabata presente, mescos cu otro ehecutivonan di A.T.A. y APA.
Despues di e palabranan di bon bini, e muchanan a ricibi un recorido di cuater ora riba Carnival Celebration pa asina explora tur locual cu e barco tin pa ofrece. For di e plataformanan amplio te na diferente actividad- y lugarnan luhoso. Durante merdia, e muchanan por a disfruta di un gran variedad di cuminda delicioso, cu a inclui un treat special cu tur mucha tabata warda ansiosamente p’e, esta e ijscream.
E actividad abordo di Carnival Celebration tabata parti di e programa “Buki di Pret.” Un organisacion voluntario dedica na organisa diferente proyecto anual pa nos muchanan local. Cu cada aña ta produci un buki yena cu actividadnan dibertido y ofertanan special durante di vakantie grandi. E meta di Buki di Pret ta pa sigura cu tur mucha na Aruba por atende actividadnan cu ta accesibel y agradabel.
Den colaboracion cu Carnival Cruise Lines, Gobierno di Aruba, Aruba Tourism Authority (A.T.A.), y Aruba Ports Authority (APA), a logra pa duna e muchanan un dia yena cu experiencianan maraviyoso y di descubrimento. Adicionalmente, nos ta desea di gradici Pelican Adventures cu a yuda na facilita transporte pa e muchanan te na e barco crucero.
Un evento cu a trece hopi alegría y sonrisa grandi riba e caranan di nos muchanan. Esaki ta reforsa e e compromiso di Aruba Tourism Authority (A.T.A.), Aruba Ports Authority (APA), y Carnival Cruise Lines, pa duna bek na e comunidad local como parti di ‘Corporate Social Responsibility’. Sigur, un dia yena di aventura, enseñansa, alegria, y naturalmente, hopi ijscream, cu a laga un marca inolvidabel den tur esnan cu a participa.
