Aeropuerto di Aruba ta reconoce e gran impacto ku sierre di aeropuerto a causa awe. Debi na un problema tecnico, 39 buelo a ser cancela, afectando plan di biahe di mas o menos 4,000 pasahero.
Durant’e anochi, un problema tecnico serio a tuma luga den nos sistema di airco debi na un ruptura den e “chiller pipe” principal. Esaki a resulta den un subida di temperatura den di terminal, creando un ambiente cu por compromete salud y seguridad di tur persona presente.
Despues di delibera, nos a tuma e desishon difisil pa para temporalmente tur operashon di aeropuerto y sera e aeropuerto. E paso aki tabata esensial pa garantisa e seguridad di nos pasahero, empleado, y comunidad di aeropuerto. Mirando cu no tabatin solushon inmediato disponibel pa restora e airco den tempo corto, tabata nesesario pa tuma medida proactivo pa preveni riesgo di salud relaciona cu temperatura halto y e humedad riba e piso cu ta forma dor di e condensashon door di e cambio di temperatura.
Pa garantisa seguridad di tur pasahero, nos a evalua disponibilidad di kamber di hotel. Hopi kamber tabata reserva caba pa pasahero cu ta yega, pero ku e sierre, por acomoda nan cu esakinan, pa duna pasahero cu ta no por a viaha mas un lugar comfortabel pa keda mientras ku nos ta atende e situashon.
E sistema di airco ta funcionando completamente atrobe y tur pasahero a ser acomoda. Nos ta trahando di serka cu tur aerolinea pa maneha rebooking di buelo i asina sigura cu pasahero afecta ta haña e sosten nesesario. E aeropuerto lo habri atrobe mañan 7or di mainta.
Nos ta pidi disculpa na tur pasahero pa e inconvenienca cu e sierre aki a causa. E seguridad di nos pasahero i empleado ta keda nos prioridad den tur desishon. Nos ta aprecia boso comprenshon i sosten mientras cu nos a navega e desafio aki.
Por fabor tuma contacto cu aerolinea pa update di buelo i bishita https://www.airportaruba.com/ pa informashon mas reciente.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 78% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport
Fecha: August 9, 2024