Oranjestad, Aruba- Recientemente Aruba Airport Authority N.V. (AAA), den colaboracion cu Aruba Tourism Authority (A.T.A.), a bishita e sede di GOL Airlines na Brasil. E bishita aki tabatin como meta pa promove e servicio nonstop nobo entre Aruba y São Paulo, Brazil (GRU) ainda mas, cu ta poni pa cuminsa na december 2024.
For di 22 di juli te cu 26 di juli, e representantenan di A.A.A y A.T.A. tabata ocupa cu diferente reunion productivo cu varios stakeholder na Brasil. E delegacion di Aruba a consisti di Jo-Anne Meaux-Arends, Aviation Business Development Executive na Aeropuerto di Aruba y e representantenan di A.T.A.: Ronella Croes, CEO di A.T.A., Jordan Schlipken Croes, A.T.A. Area Director LATAM y Carlos Barbosa di A.T.A. Brasil.
Reunion strategico y participacion di stakeholder
Durante e siman, e delegacion tabatin reunion strategico cu varios representante di GOL Airlines, incluyendo esnan cu ta planifica e red, mercadeo y e teamnan di benta. Tambe tabatin diferente combersacion importante cu e operadornan di tour pa Aruba p’asina sigui promove e ruta nobo aki y explora e oportunidadnan de mercadeo colaborativo.
Impulsando conexion y capacidad
Region di Latino America a experencia un crecemento significante na aña 2023 y ta anticipa pa alcansa mas cu 309.500 asiento pa fin di aña 2024, demostrando un crecemento solido aña tras di aña di 43%. GOL Airlines, cu ta cla pa lansa buelo directo pa Aruba cu tres vuelo semanal cuminsando na december 2024, ta anticipa pa añadi aproximadamente 510 asiento semanal for di Brasil, aumentando e capacidad di asiento for di Latino America ainda mas.
E ruta nobo aki ta un desaroyo significativo pa Aruba, mirando con e mercado di Brasil a demostra un crecemento remacabel, cerando aña 2023 cu un aumento di 24% compara cu aña 2019 y un crecemento di 33% den e prome mita di aña 2024 compara cu e mesun periodo na aña 2023. E desaroyo aki ta cuadra cu nos meta pa logra un crecemento di 40% den e mercado Brasilero pa aña 2025, enfoca riba 25.9000 bishitante Brasilero.
Cu e introduccion di GOL Airlines, Aeropuerto di Aruba lo ta anfitrion di 28 compania di aviacion, cu São Paulo lo bira e di 32 conexion directo pa Aruba. E expansion aki t’un parti crucial di nos strategia pa diversifica y engrandece e balor di nos sector turistico, enfoncando riba e mercadonan di balor halto y alabes fomentando aliansa fuerte cu e aerolineanan.
Cu bista riba futuro
E asociacion cu Gol Airlines ta pone enfasis riba nos compromiso di mehora e accesibilidad y conexion pa Aruba. Door di aumenta e opcionnan di vuelo y engrandece nos red, nos ta busca pa consolida e posicion di Aruba como un destino di prome nivel den Caribe, ofreciendo mas comodidad y opcion p’e biaheronan.
Nos ta extende nos gratitud na e team di Gol Airlines pa nan cooperacion y vision comparti. Hunto, nos ta sigur cu e asociacion aki lo establece record nobo y lo fortalece e lasonan entre Aruba y Brasil ainda mas.
Detaye di vuelo GRU-AUA
E serivicio lo inicia cu tres buelo semanal durante temporada halto, operando riba dialuna, diaranson y diasabra. Haciendo uzo di un avion Boeing 737-8 MAX c’un capacidad di 176 asiento.
| Ruta | Ora di salida | Ora di yegada |
| AUA-GRU | 10:30 PM | 5:50 AM |
| GRU-AUA | 3:30 PM | 9:00 PM |
Ticket ta obtenibel pa cumpra riba e website di GOL: www.voegol.com.br/en, riba nan app of cerca agencianan di biahe.
E biaheronan tin opcion pa cumpra GOL Premium Economy Class, cu ta ofrece mas espacio dilanti y mas chens pa “recline”, dos maleta registra y un servicio mas elabora den buelo of Basic Economy.
Tocante AUA Airport
AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 78% ta di Merca y Canada, 14% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu
instalacionnan moderno y ademas cu un excelente servicio n’e cliente p’asina por
refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y
conecta cu AUA Airport riba Twitter.com/Aruba_Airport, Facebook.com/ArubaAirport,
Instagram.com/arubaairport