ORANJESTAD: Minister Endy Croes a ricibi bishita di e softbalista talentoso Shakeena Croes hunto cu su kerida mama Sra. Suzy Croes y famia. Durante e encuentro ameno, e atleta elite di softball a comparti e grato noticia cu e ta saliendo den luna di augustus pa hunga den e Campeonato 2024 di Softball AA Fastpitch femenino na Corsou. Recientemente, Shakeena a firma oficialmente cu S.B.T Fenix Softball Team. Na un edad jong Shakeena a hunga cu Seleccion Femenino di Aruba. Na aña 2012, el a hunga cu Seleccion di Aruba na Bahamas den e campeonato ECASC, unda cu Pais Aruba a titula campeon. Tambe el a participa den e torneo di Sur America: CONSURSA. Algun aña pasa, e hoben atleta bay Hulanda, unda el a wordo selecta pa hunga cu Seleccion di Hulanda den A Status, pero lamentablemente den pleno entrenamento el a kibra su enkel. A tuma 3 aña pa e hoben atleta por a recupera di e lesion. El a pasa den varios operacion, tratamento y terapia. Shakeena ta tumando tratamento ainda, pero e ta cla pa ta bek den accion. Den nomber di Gobierno di Aruba, Minister Endy Croes a haci entrega di e medaya di 4D na e hoben softbolista. Pa conclui, e mandatario di Deporte ta desea Shakeena tur clase di exito den su “comeback” y e campeonato na Corsou.