Teorianan di conspiracion ta ofrece splicacionan alternativo pa susesonan. Semper e splicacion alternativo aki ta culpa un grupo chikito (“The Elite”) di ta patras di e susesonan. Por ehempel e noshon cu 9/11 a wordo plania of cu CIA a hunga un rol den e asesinato di John F. Kennedy. Den nos articulo anterior, nos a explora dicon hende ta wordo atrae na e teorianan alternativo aki. Awor, laga nos contesta un otro pregunta: Ken ta kere den teorianan di conspiracion?
Hopi biaha cientificonan ta studia corelationan pa contesta e sorto di preguntanan aki. Corelation ta referi na un relacion entre dos variabel caminda cambio den un ta asocia cu un cambio den e otro. Por ehempel, studiando mas ta conduci na puntonan di examen mas halto—un corelation positivo. Al contrario, tin un corelation negativo entre bebe koffie y drumi. Pasobra mas koffie bo bebe menos bo lo drumi.
Psicologonan tambe ta investiga si cierto parti di bo personalidad ta corela cu un creencia den teorianan di conspiracion. Pues, ken tin e tendencia di kere den nan?
Prome, laga nos papia tocante creencianan pseudocientifico, esaki ta ideanan cu ta pretende di ta cientifico pero no ta atene na e metodo cientifico, manera astrologia of alternative medicine. Hende cu ta tene e creencianan aki hopi biaha ta mira patronchinan cu eigenlijk no exisiti, loke ta haci nan mas propenso pa kere den teorianan di conspiracion. Dus, den e caso aki tin un corelation positivo entre creencia den pseudociencia y creencia den teorianan di conspiracion.
Na di dos luga, investigacion ta indica un conexion entre teorianan di conpspiracion y narsisismo. Individuonan narcisista hopi biaha tin un sentido inflaciona di importancia propio, loke ta pone nan kere cu nan tin un bista unico cu otronan no tin. E tipo di personalidad aki por haci nan menos propenso pa evalua teorianan di conspiracion criticamente y na su turno ta mas inclina pa acepta nan.
Di tres, individuonan cu schizotypy—un set di rasgonan di personalidad relaciona cu, pero menos severo, cu schizofrenia—tambe ta mas propenso na kere den teorianan di conspiracion. Schizotypy ta inclui pensamentonan y comportacionan inusual, manera kere den podernan magico of telepatia. E corelacion aki por ta debi na un manera di pensa comparti: un mentalidad sospechoso. Hende cu schizotypy y esnan cu ta kere den teorianan di conspiracion hopi biaha tin un sentido di sospecho aumento tocante cierto susesonan.
Mientras cu hopi factor psicologico ta corela cu creencia den teorianan di conspiracion, nos a destaca tres di esnan mas significante: creencianan pseudocientifico, narsisismo y schizotypy. Sinembargo, si bo ta identifica cua cualkier di e personalidadnan aki of conoce un hende cu por tin e personalidadnan aki, esey no necesariamente ta nifica cu bo ta kere den teorianan di conspiracion. Corda, corelacion no ta automaticamente nifica causalidad; djis pasobra dos cos ta relaciona cu otro no ta nifica cu un ta causa e otro.
Den conclusion, contestando e pregunta “ken ta kere den teorianan di conspiracion?” por yuda nos compronde kico ta causa creencia den teorianan di conspiracion. Mientras cu cierto parti di personalidadnan por corela cu e creencianan aki, ta esensial pa aserca e topico aki cu nuansa y pensamento critico. Door di lesa articulonan cientifico cu mente habri y curiosidad, nos por compronde miho e factornan cu ta influencia creencia den teorianan di conspiracion y con pa atende cu hendenan cu ta kere den e typo di teorionan aki.
Marc Croes, MSc.
Cognitive Psychologist