“Boso determinacion pa representa Aruba riba e scenario mundial ya ta un logro grandi y Aruba ta hopi orguyoso di cada un di boso”
Paris, Francia, ta anfitrion di e Weganan Olimpico e aña aki for di 26 di juli te cu 11 di augustus. Weganan Olimpico Paris 2024 oficialmente a inicia diabierna ultimo na unda cu e eventonan tin como meta pa mescla tradicion cu innovacion, enfoca riba sostenibilidad, union y paz, tecnologia, inclusividad y diversidad y un celebracion di cultura. Esaki ta di tres biaha cu Paris ta anfitrion di Weganan Olimpico, e prome na 1900, e di dos na 1924 y awo, despues di 100 aña, un biaha mas e miho atletanan di mundo ta competi den e prestigioso Weganan Olimpico na Paris.
Mas di 10.500 atleta for di 206 pais ta compitiendo den 32 deporte y 329 evento. Delegacionnan, durante ceremonia di inauguracion, a participa cada un poniendo enfasis na colornan di nan bandera y nan cultura. Delegacion di Aruba a luci cu diseño di Andrew Curiel, kende a inspira tambe riba colornan di nos bandera y cultura.
E apertura tawata un celebracion hopi spectacular y a enfatisa cultura, historia y innovacion Frances na unda cu pa prome biaha den historia di Olimpiada, e ceremonia di apertura a tuma luga diferente di un setup tradicional den un stadion. River Seine tawata e stage cu a mustra e bunitesa di Paris na unda cu delegacionnan a haci nan entrada cu botonan di diferente tamaño, cada pais encabesa cu nan cargador di bandera di nan pais. E procesion di 6 kilometer y 85 boto den e rio, a proyecta luganan icono di Paris manera e Eiffel Tower, Notre-Dame Cathedral, y e Museo di Louvre. Un ceremonia diferente, enfatisando arte, musica, baile y cultura Frances.
E Weganan Olimpico ta mas cu solamente un competencia; nan ta un celebracion di humanidad, nan ta testimonio di kico por logra door di trabou duru, perseverancia, y disciplina propio. Prome Minister Evelyn Wever-Croes, den nomber di Gobierno di Aruba, ta desea e delegacion olimpico di Aruba y tur seis atleta cu ta participa den diferente deporte, hopi exito. Un danki tambe na señora Nicole Hoevertsz, Secretaria general di COA y Vice – presidente di IOC, cu a core cu e antorcha di e Weganan Olimpico door di cayanan di Paris.
“Boso determinacion pa dedica tempo pa train y prepara pa representa Aruba riba e scenario mundial ya ta un logro grandi y Aruba por ta hopi orguyoso di cada un di boso. Awo na Paris, boso tin e oportunidad pa demostra boso talento y dedicacion na mundo. Biba cada momento cu curashi y confiansa den boso mes. Competi cu integridad y orguyo. Boso contribucion na deporte y participacion na e Weganan Olimpico ta grandemente aprecia. Aruba completo ta orguyoso di cada un di boso. Danki pa pone Aruba su nomber un baiha mas resona mundialmente den e ramo di deporte. Exito na cada un di boso’, Prome Minister a expresa.