BACKGROUND
Dia Internacional pa Conservacion di Ecosistema di Mangel (International Day for Conservation of the Mangrove Ecosystem) a ser adopta na e Conferencia General di UNESCO na 2015 y ta ser observa cada aña riba 26 juli desde 2016.
E dia aki tin como obhetivo pa crea concientisacion pa e importancia di ecosistema di mangel como un “ecosistema, unico, especial y vulnerabel” y pa promove solucionan pa nan maneho, conservacion y utilisacion sostenibel.
Na 2017 Nacionan Uni a proclama e Decada di Nacionan Uni di Ciencia Oceanico pa Desaroyo Sostenibel pa e periodo 2021-2030, y a invoca e Intergovernmental Oceanographic Commission di UNESCO (IOC-UNESCO) pa prepara un plan di implementacion pa e Decada den consulta cu Estadonan Miembro di Nacionan Uni, organisacionan specialisa, fondo, programa y organismo di Nacionan Uni y demas otro entidad intergubernamental, NGOs y stakeholders.
IOC-UNESCO a crea un Plan di Implementacion, y a formula un Roadmap, Obhetivo, Desafio y Meta pa logra, tur den e cuadro di e Obhetivonan di Desaroyo Sostenibel (SDGs).
Na 2019 Nacionan Uni a adopta e Decada di Nacionan Uni pa Restoracion di Ecosistema (2021- 2030), cu e meta principal pa restora ecosistema terrestre y marino y pone un paro na e perdida di diversidad biologico alarmante riba Planeta Tera.
Na final di 2022 durante e 2022 UN Biodiversity Conference COP15-CP/MOP10-NP/MOP4 teni den dos parti na Montreal, Canada y Kunming, China a adopta e Kunming-Montreal Global Biodiversity Framework formulando 4 elemento clave pa logra pa 2050 y 23 meta pa logra pa 2030.
E aña aki a conoce e primicia di e promer evaluacion global (global assessment) di e IUCN Red List of Ecosystems cu a keda publica riba 22 mei 2024, Dia Mundial pa Diversidad Biologico. E publicacion nobo aki di e IUCN Lista Cora di Ecosistema di Mangel riba 22 mei 2024 ta marca un logro importante. Como prome evaluacion global di un grupo funcional di ecosistema completo, e raport aki den e cuadro di e IUCN Lista Cora di Ecosistema ta destaca alarmante preocupacionan tocante el posibel colapso di ecosistemanan di mangel den henter mundo.
Fuera di e posibel colapso a resalta tambe cu un tercer parti di tur ecosistema di mangel lo ser impacta severamente pa e subida di nivel di laman causa dor di cambio climatico.
TEXTO DERIVA DI E MENSAHE DI AUDREY AZOULAY, DIRECTORA GENERAL DI UNESCO NA OCASION DI DIA INTERNACIONAL PA CONSERVACION DI ECOSISTEMA DI MANGEL. Mangelnan ta forma ecostimenanan unico, espectacular y prolifico riba e frontera entre tera y laman. E ecosistemanan extraordinario aki ta contribui na e bienestar, siguridad alimentario y proteccion di comunidadnan costero mundialmente. Nan ta sostene un biodiversidad rico y ta provee un habitat di refugio y criadero pa especie di pisca y crustaceo. Y alabes ta actua como un defensa natural costal contra di mareanan ora di mal tempo, tsunami, erosion, y subida di nivel di laman.
E suelo rondonando mangelnan ta constitui un depositorio pa retencion di carbon hopi efectivo, absorbando enorme cantidad di dioxido di carbon for di laman y atmosfera.
Pero mangelnan ta desapareciendo tres pa cinco biaha mas rapido cu e perdida cumulativo global di boskenan, cu impactonan serio ecologico y socio-economico. Calculacionan actual ta indica cu areanan cubri pa mangelnan a ser reduci na mitar den e ultimo 40 aña.
Mangelnan ta coriendo peliger: ta ser calcula cu mas cu tres cuarto di tur mangel na mundo ta bou menasa y cu nan tur organismo acuatico y terrestre cu ta depende di nan.
Pa e razon aki, UNESCO ta tumando accion pa proteha nan y otro valioso ecosistema di carbon blou (blue carbon ecosistems) mediante e rednan di reservanan di biosfera, geoparkenan global y sitionan di patrimonio mundial natural.
Pero enfrentando e emergencia climatico nos mester tuma mas paso ainda, pasobra mangelnan ta sirbi como depositorio di dioxido di carbon, cu nos no por permiti pa nan desaparece. Pesey un proyecto di UNESCO ta enfocando riba e restoracion di boske di mangel den shete pais latinoamericano- Colombia, Cuba, Ecuador, El Salvador, Mexico, Panama y Peru. E proyecto lo trece oportunidad economico pa comunidadnan y yuda pa comparti conocimento entre poblacionan local, indigena y cientificonan.
UNESCO tambe ta sostene e cultivo di mangelnan flotante, mientras tanto tambe realisando investigacion riba nan capacidad di secuestra (absorba) dioxido di carbon na Lusail Marina, Qatar. Basa riba e mesun idea e Universidad di New South Wales na Australia a inicia un proyecto cientifico pa cinco aña hunto cu e Universidad di Pacifico Sur pa perfecciona e concepto na e isla di Fiji, cu sosten di Swire Shipping y UNESCO.
Ademas di proteccion y restoracion, nos tambe mester di concientisacion global. Esaki ta netamente e pensamento tras e prome International Conference on Mangrove Conservation and Restoration cu lo tuma lugar na Abu Dhabi di 10 pa 12 december e aña aki, den cual UNESCO ta colabora. Aumentando e concientisacion pa e valornan natural di mangelnan, por logra pa proteha nan mihor. Esaki ta e meta di Dia Internacional di pa Conservacion di Ecosistema di Mangel, pa un y tur tuma nota di e valor, beyesa y vulnerabilidad di mangel y haci un compromiso pa proteha nan.
SITUACION NA ARUBA
E situacion di mangelnan na Aruba ta alarmante. Den diferente area na costa sur for di Varadero Marina te na dump di Parkietenbos mangelnan ta sufri na man di hende sin escrupulo cu ta corta, kita y destrui area di mangel pa traha pier priva pa mara nan boto of yate.
E areanan di Spaans Lagoen, Mangel Halto, Santo Largo, Parkietenbos y Zeewijk ta impacta pa polucion, sobredesaroyo di turismo of mal maneho. Instancianan concerni ta sordo mudo y ciego pa personanan individual of companianan construyendo apartamento of lugar di hospedahe AIRBNB. E esfuerzonan di Aruba Conservation Foundation, oficialmente registra na Camara di Comercio ainda como Fundacion Parke Nacional Aruba ta pa puro consumo local y cosmetico ya cu pariba di brug den area di Grapefield, Boca Grandi y Seroe Colorado desaroyo di turismo a caba of ta cabando completamente cu vegetacion natural unico y tambe mangelnan.
Den e 4th International Conference on SIDS teni 27-30 mei 2024 na Antigua Rainbow Warriors Core Foundation a participa y a establece contactonan internacional en particular cu e Universidad di Pacifico Sur, International Science Council y varios otro NGO internacional pa inicia programa y proyecto di colaboracion riba e tereno di desaroyo sostenibel y resiliencia di comunidad costero, cambio climatico, conservacion di biodiversidad y restoracion di ecosistema en particular di ecosistema di carbon blou manera di mangel.