ORANJESTAD – Tras un salida sumamente exitoso aña pasa, e Food Truck Festival San Nicolas ta bek diasabra awo, 27 di juli 2024. E biaha aki mas grandi y cu mas variedad pa asina complace e publico. Pasa menos tempo ta cumpra y mas tempo ta saboria e cuminda dushi y gosa di e bon ambiente. E tema di e segundo edicion organisa pa Harambe Foundation y Vibration PR cu sosten di Minister di Transporte, Integridad, Naturaleza y Asunto di Adulto Mayor, Ursell Arends, ta Siguridad di Cuminda.
Durante un conferencia di prensa na Nicolaas Store, Nick Gordon, presidente di Harambe Foundation a splica cu ta importante pa mustra cu awendia nos isla ta conta cu hopi agricultor local y cu nan mester di nos apoyo pa sigui crece. Cu nan presencia den e festival ta yuda nan presenta na un publico grandi nan producto y resalta e bentahanan cu consumo local tin riba nos salud y economia familiar.
Food Truck Festival San Nicolas 2024 ta cuminsa di 6’or di atardi y lo core te 11’or di anochi cu un lista di food truck cu ta inclui, entre otro, Cook Out by Green Fish, Pofferdorie, Keda Keto Ice Cream, Ruiz Take Away, Mr. Bean’s Coffee and Tea Tuk Tuk, Robert’s Smoke Pit, Toko, Bambi, King Churro, Tia Rosa, Pork-nographx Aruba, Charmjam’s Jerk House, Craft-Beer Lovers-aruba y Amuse Catering. Banda di esey, tin e establecimentonan fiho den Promenade San Nicolas cu tambe lo ta habri, manera Mauchi’s Smoothies, The Movies @ Principal y O’ Neils Kitchen.
Ademas di bon cuminda y co’i bebe, Maria Silva Hart di Vibration PR a splica cu lo tin tambe stands cu diferente marca y producto local pa bishitantenan conoce y cumpra manera Aruba Life Organics, Potpourri, Cos di Cabey, Pearl Tree crochet, Miss Elise Hair Accesories y Recycle Art Aruba; djis pa menciona algun.
Tur esaki lo sosode den e area di O’Neils Kitchen bay ariba, incluyendo e caya dilanti di The Movies @ Principal cu ta destina pa tur entretenimento pa mucha, mientras cu ta pasa e rotonde dilanti di Nicolaas Store bay pa acomoda tur stand di arte.
E idea tras di e evento ta cuadra perfectamente e mision di Departamento di Agricultura, Cria y Pesca. Asina Randy Maduro di Santa Rosa a indica. A traves di diferente forma, nan ta motiva e comunidad Arubano pa produci y consumi mas cosecha y cria local, garantisando asina e suministro di cuminda.
Y pa promove e food trucknan pa cumpra nan ingrediente for di nos propio agricultornan, diasabra mainta Santa Rosa lo tin un Pop Up Market special na nan sede na Piedra Plat caminda lo ofrece carni, fruta y berdura cu cual por ofrece anochi un cuminda berdaderamente local. E mercado ta habri pa publico en general tambe.
Entretenimento musical no por keda afo y esaki ta den man di un faborito di henter Aruba, esta Groove Masters. Tambe lo t’ey Tipico Palisia pa pone tur hende baila. Entrada ta gratis y tur hende ta bon bini. Bin cu stoma bashi pa bo purba tur cos dushi cu lo tin y bin cu placa los pa cumpra na e diferente truck, aunke tambe lo tin mashin pa swipe. Food Truck Festival San Nicolas 2024 ta posibel danki na e cooperacion di De Palm Tours, EcoTec, AHATA, Kulture Café, Setar N.V., WEB Aruba N.V., Aruba Tourism Authority y Tropical Bottling Company.
Pa mas informacion por yama 593-2880 of email [email protected].
