ELMAR ta informa riba 3 storing den e area di Balashi y Santa Cruz

Oranjestad, 23 di juli 2024 – ELMAR ta informa e comunidad den e area di Balashi, Santa Cruz y vecindario tocante 3 incidente di storing cu a sosode durante e ultimo 3 dianan aki.
Promer Incidente:
E promer incidente a sosode riba diasabra, 20 di juli 2024, pa alrededor di 11:40 AM, ora un vehiculo a hit & run un steunpaal resultando cu un palo di coriente bin abou y afecta e suministro di coriente. ELMAR su tecniconan a actua y pa 1:05 PM a reestablece e servicio di coriente pa e mayoria di e barionan afecta.
Di Dos Incidente:
E di dos incidente di storing di coriente a sosode tambe riba diasabra, 20 di juli 2024, pa 7:22 PM. E causa di e interupcion tabata un fayo riba un kabel bou di tera. Durante e temporada di calor rondo di juni te cu september, e temperaturanan halto y aumento repentino di consumo ta afecta e condicion di e kabelnan y ekiponan di distribucion di coriente, cu por conduci na interupcion di suministro di coriente. Pa 8:56 PM por a bolbe suministra coriente y reestablece servicio na mayoria di e barionan afecta, mientras cu e trabounan di reparacion tabata tuma lugar den e area directamente afecta.
Di Tres Incidente:
E di tres incidente a sosode riba diamars, 23 di juli 2024, pa alrededor di 4:00 AM, den e proceso pa reconecta e bario di Savaneta door di un kabelstoring cu a surgi na San Nicolas, nos substacion di Balashi cu ta suministra coriente pa Balashi, Santa Cruz y vecindario a desconecta di e grid di coriente. E substacion di Balashi ta suministra coriente na e areanan di un parti di Santa Cruz, Balashi, Savaneta, un parti di San Nicolas y vecindario. Inmediatamente nos a reconecta bek e area di Balashi y Santa Cruz pa alrededor di 4:28 AM.
Esaki ta debi cu ayera madruga alrededor di 2:51 AM a surgi un kabelstoring na San Nicolas. Hopi lihe e tecniconan di ELMAR a identifica e problema y a logra isol’e. Durante e temporada di calor, e red di coriente ta experiencia un presion adicional cu por conduci na storing. Pa 3:38 AM a cuminsa reestablece coriente pa e barionan afecta y mayoria di cliente tabata tin servicio di coriente bek. Den proceso di restauracion, un componente di coriente den casita di coriente na Savaneta den e mesun red di coriente a sufri daño y afecta e suministro di coriente den e area. Pa 9:58 AM, e ultimo 15 casnan den e area di Savaneta a haya servicio di coriente bek. Nos ekipo tenico a traha incansablemente henter marduga pa restaura e suministro di coriente.
ELMAR ta pidi disculpa pa e inconveniencia cu e incidente nan aki a causa y ta sigui traha pa sigui garantisa suministro di coriente.