Debi na un maneho financiero responsabel, Gobierno a cumpli!
“Danki na e sindicatonan pa e forma profesional y al caso cu a hiba e negosacionnan”
ORANJESTAD – Prome Minister Evelyn Wever-Croes ta duna di conoce cu e luna aki empleadonan publico lo ricibi e prome parti di e indexering cual ta 6%, y na januari 2025 nan lo ricibi e demas 5.7%.
Despues cu Parlamento algun siman pasa a aproba e Presupuesto Supletorio 2024 cu 12 Parlamentario na fabor y 9 contra, awor Gobierno di Aruba tin e mandato y lo cumpli cu e pagonan di indexering na empleadonan publico. E indexering ta di e periodo di aña 2018 te 2023. Desde 2018 empleadonan publico no a ricibi un aumento di entrada basa riba e inflacion (indexering), pero awor Gabinete Wever-Croes a cumpli cu nan.
Prome Minister, sumamente complaci cu echo aki, ta felicita e empleadonan publico pa e merecido aumento aki, pero mas ainda, ta gradici nan pa e pasenshi y pa e trabou importante cu nan ta eherce, sirbiendo e comunidad di pais Aruba.
Tambe Prome Minister ta manda su palabranan di gradicimento na e sindicatonan cu na un forma profesional y al caso a hiba e negosacionnan. E proceso no tawata facil ya cu no semper tur hende tawata riba e mesun liña, pero semper tawatin un meta comun, e beneficio di e empleadonan publico. Pa nan por ricibi e compensacion cu nan tin derecho riba dj’e debi na e perdida di forsa di compra den e ultimo añanan.
Prome Minister ta indica cu debi na un maneho financiero responsabel di Gobierno, e pago aki ta posibel. E prome pago ta di un aumento di 6%, y na januari 2025 lo paga e demas 5.7 %. Debi na e pandemia mester a stabilisa e pais prome, despues a bin e fase di e recuperacion y despues a crea espacio financiero pa por a paga e indexering aki sin cu e ta causa un peso adicional riba presupuesto di Gobierno.
“Mi ta gradici Parlamento pa aproba Presupuesto Supletorio 2024 pa por a cumpli cu e empleadonan publico. A conta cu aprobacion di coalicion MEP/RAIZ y di Parlamentario Independiento Ryçond do Nascimento. Danki pa para na banda di e empleado publico. Un biaha mas danki na e sindicatonan y na coleganan minister cu a duna nan aporte pa awe nos por ta asina leu. Pabien y danki di curason na tur empleado publico y ohala esaki por ta un estimulo pa sigui sirbi comunidad di Aruba, mientras nos ta sigui traha pa mehora e servicio di Gobierno na e comunidad di Aruba”, Prome Minister a declara.