Aña escolar 2023/2024 tawata un aña cu retonan pero tambe cu logronan importante
Bon temporada di Vakantie na nos muchanan y un exitoso aña escolar 2024/2025
ORANJESTAD– Ya ta un siman cu nos muchanan ta gosando di vakantie bon mereci despues di un aña escolar yen di siñamento duro, crecemento como tambe cu hopi reto y trabou duro. Nos muchanan na scolnan rond Aruba sigur a mustra dedicacion remarcabel den nan estudio mirando e bon resultadonan. Apesar cu tin muchanan cu mester ripiti klas, nos tur mester ta orguyoso cu cada esfuerso, dedicacion y logro ta fortelece e fundeshi pa un futuro mas briyante.
“Aña escolar a yega su final siman pasa, y ya hopi ta esnan cu ta disfrutando di un dushi vakantie. Aña escolar 2023/2024 tawata un aña cu retonan pero tambe cu logronan importante. Por mira atras na un aña escolar hopi exitoso”, Prome Minister Evelyn Wever-Croes a remarca.
Mientras nos muchanan ta disfruta di un dushi vacantie bon mereci, Prome Minister a tuma e oportunidad pa extende su gratitaud na tur esnan cu ta traha riba tereno di enseñansa. Tur docente, maestro, esnan cu ta sostene e scolnan administrativamente, esnan den area di mantencion y limpiesa y tur cu ta contribui na un manera of otro cu enseñansa. “Boso dedicaion, trabou duru y compromiso pa cuida nos mucha y hobennan ta hopi aprecia. Boso ta forma e futuro di nos nacion”, Prome Minister a enfatisa.
Prome Minister ta desea e studiantenan cu a gradua y ta bay studia den exterior hopi exito. Su conseho pa nan ta pa nan keda enfoca riba nan metanan pa nan logra. “Y corda cu unda boso bay boso ta un embahador di Aruba, y nos ta confia cu boso lo representa nos pais dignamente. Pronto boso lo ta bek na boso dushi isla pa yuda cu e desaroyo di Aruba”.
Palabranan di curashi y forsa tambe ta bay na e mayornan cu tin cu habri hala y laga nan yiunan bay. Esaki, Prome Minister a expresa ta un de e cosnan mas dificil cu un mayor lo mester haci pero esaki ta na bienestar di nan yiunan. Mester laga nan bay y confia cu e fundeshi cu cada mayor a duna nan yiunan ta suficiente pa nan ta exitoso den bida.
“Pabien na tur esnan cu tawatin un aña escolar exitoso, boso a mustra cu trabou duro tin su beneficio y fruto. Forsa na esnan cu tin cu ripiti e aña, cu positivismo y trabou duro boso lo logra e siguiente aña escolar, 2024/2025. Hopi exito y forsa na esnan cu ta bay studia den exterior y na e docente- y maestronan, danki pa e pasion cu boso tin pa boso trabou, ohala boso por descansa y gosa di un dushi vakantie. Cu Dios bendiciona boso tur”, Prome Minister a expresa.