Den cuadro di transparencia y informacion nos di Horacio Oduber Hospital ta comparti cu boso e cifranan pa loke ta luna di juni 2024. Como Hospital ta importante y alabes interesante pa duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto baby a nace durante luna di juni, cuanto pashent a regresa cas despues di admision y mas.
Na luna di juni a admiti 867 pashent cual ta mas halto cu na luna di mei (836 pashent) y tambe mas halto cu na luna di april (828 pashent). Di e pashentnan admiti na HOH, e cantidad femenino tabata 473 pashent y solamente 26.4% di e admisionnan tabata planea. E promedio di duracion admiti na HOH na luna di juni tabata 4,3 dia. Na juni ocupacion di cama a bolbe subi pa 94,9% compara cu na luna di mei (83,2%). A haci un total di 558 operacion cu ta poco menos cu na luna di mei (622).
Departamento di Emergencia a atende na luna di juni 3007 pashent cu ta mas pashent cu na luna di mei (2792 pashent) y tambe mas cu na luna di april (2704). Durante luna di juni a yama bon bini na un total di 44 baby mucha homber y 34 baby mucha muhe (total 78 baby). Y na mei Bloedbank Aruba a ricibi un total di 160 donacion di sanger.
Un total di 7127 consulta a ser teni na luna di juni cu pashent pa specialistanan den servicio di Hospital. Departamento di radiologia a haci un total di 4919 test y tambe 12519 persona a bishita LABHOH na luna di juni. Y por ultimo un total di 838 pashent a regresa nan cas despues di admision na HOH durante luna di juni.
Informacion ta esencial y pues hospital semper t’ey 24/7 via nos website www.arubahospital.com of diferente pagina di medionan social y claro nos team di profesional semper t’ey pa brinda cuido di calidad 24 ora pa dia 7 7 dia pa siman.
FIN